Juan II van Oostnryk

Don Juan II van Oostnryk (Madrid, 7 april 1629 - Madrid, 17 september 1679) was e Spaanschn generoal en stoatsman. Je was van 1656 tout 1659 landvoogd van de Zudelikke Nederlandn en tusschn 1677 en 1679 wast ’n eeste minister van Spanje.

Zyn leevn

Don Juan was erkend ols buutnechtelikke zeune van Filips IV van Spanje en je wierd doadeure ipgebrocht lik e prins. Zyn moeder was de toneelspeelster Maria Inés de Calderón.

In 1647 wierd ’n no Napels gezoundn mè militaire versterkinge vo de vicekeunink Rodriguez Ponce de Léon te steunn teegn d’n ipstand, angevoerd deur Masaniello. En loater ols vicekeunink no Sicilië vor ’n ende te moakn an de pacificoatie van Catalonië, da sedert 1640 in ipstand was. Je was doa vrêe populair, nie ollene omdat ’n voorstander was van vrede mo je kwam ook sympathiek over en j’aa z’n uuterlik mee, in teegnstellinge mè de meeste andere Habsburgers.

In 1656 wierd ‘n landvoogd van de Zudelikke Nederlandn, die ip da moment ipstandig woarn teegn under soeverein Filips IV van Spanje.

Don Juan toogdeg em vrêe courageus in d’ooroogn teegn Vrankryk en Iengeland.

Je was styf ambitieus en je makte de foute dat ’n em mè z’n tweeëntwintig joar joungere olfzuster Margaretha Theresia van Spanje wildeg verloovn. Keunink Filips IV was nie akkoord, want j’aa z’n dochter beloofd aan eur nounkel, keizer Leopold I van ’t Illig Roomsche Ryk vor azo eur positie in d’erfipvolginge t’oudn en de rechtn ip de troon via eur kinders voort te loatn goan. In 1665 pakte Filips Don Juan z’n recht ip erfipvolginge of.

Van 1677 tou an z’n dood wast ’n eeste minister ounder z’n olfbroere Karel II van Spanje, die zwakzinnig was. Don Juan ielp em vele, je gaf em lesse en probeerdeg’ em te leern leezn en schryvn.

In 1678 zound ’n Karels moeder Maria Anna Van Oostnryk weg uut Madrid. D’n zeevntienstn september 1679 ist ’n gestorvn en kost ze werekeern.