Tour de France 2010

'n Tour de France 2010 is 'n 97stn Tour uut de geschiedenisse. 't Wos e tour me nog wel bergn, mor ouk en surtout me 7 kossiestrookn, woavan 3 uut Parys-Roubaix. 't Was 'n rit woa dan de mêeste favorietn indeliks benauwd vôorn woarn.

De rittn van 'n Tour 2010.

E beguste in Holland, in Rotterdam, en passirde ouk in België, oundermêer in Meise, woa dat Eddy Merckx wunt.

Uutendelik wos 't Alberto Contador die zyn derdn Tour won met e grôte hoolve menute vôorn up Andy Schleck. Me Jurgen Van den Broek stoeg ter voun 'n êeste kêe in 24 joar were e Belg in d'êeste vuve. 't Groen is voun 'n êeste kêe voun Alessandro Petacchi, Anthony Charteau wint voun 'n êeste kêe de bolln.

Gegeevns

• 21 rittn tusschn 4 en 26 juli
• 3445 km
• 22 ploegn
• 180 coureurs

Ploegn

't Dein 22 ploegn mei, doavan woarn der 18 Pro Tourploegn.

AG2R-La Mondiale (FRA) Astana (KAZ) Bbox Bouyges Telecom (FRA) BMC Racing (VS) Caisse d'Epargne (SPA) Cervélo TestTeam (ZWI)

Cofidis (FRA) Euskaltel-Euskadi (SPA) FDJ (FRA) Footon-Servetto-Fuji (SPA) Garmin-Transitions (VS) Katjoesja (RUS)

Lampre-Farnese Vini (ITA) Liquigas-Doimo (ITA) Milram (DUI) Omega Pharma-Lotto (BEL) Quick-Step (BEL)

Radioshack (VS) Rabobank (NED) Saxo Bank (DEN) Sky (GB) Team HTC-Columbia (VS)

Coureurs

Favorietn

• Alberto Contador (winnoare in 2007 en 2009)
• Carlos Sastre (winnoare in 2008)
• Cadel Evans (twiddn in 2007 en 2008)
• Denis Mensjov (winnoare van 'n Giro in 2009)
• Lance Armstrong (7x winnoare)
• De broers Schleck, surtout styve goeie klemmers
• Bradley Wiggins (vierde plekke in 2009)
• Ivan Basso (winnoare van 'n Giro 2010)
• Jurgen Van Den Broeck (idder en outsider, Belgischn hoop voun 't klassement)

West-Vloamiengn

• Jurgen Van de Walle (Quick-Step): mei in e vlucht van 175 kilomeiters tusschn Epernay en Montargis (rit 5) en ouk in rit 17 no Pau.

Overzicht rittn

Rit 1 - 3 juli - Fabian Cancellara

• Rotterdam (8 km - tydrit)

Fabian Cancellara wint met 10 secondn vôorn Tony Martin, die bykan hêeln tydrit up kop estoan hed. Armstrong is 'n vierdn en pakt 5 secondn up Contador.

Rit 2 - 4 juli - Alessandro Petacchi

• Rotterdam > Brussel (224 km)

Ol van in d'êeste kilomeiters sproungn Maarten Wynants, Lars Boom en 'n Navarrees Alan Perez, ze gienkn tope 170 kilomeiters up kop bluuvn ryen. Me nog 30 kilomeiter te goan, gienk Wynants ollêne weg, e bitje loater kwam 'n Moldavischn kampioen Alexandre Pljoesjin derby, mo ze krêegn nôois mêer of e minute. Achter dan z'inhoald zyn, begust het gevoarlik te kommn en 't vieln up 't ende êentige favorietn voun d'overwinnienge, lik Mark Cavendish en Oscar Freire. Uutendelik wos 't Petacchi die 'n rapstn wos, vôorn Renshaw en Hushovd. 'n Êestn Belg wos Jurgen Roelandts up de tienste plekke.

Rit 3 - 5 juli - Sylvain Chavanel

• Brussel > Spa (192 km)

Uut e langn vlucht me Jurgen Roelandts, Matthew Lloyd, Marcus Burghardt, Jérôme Pineau, Sébastien Turgot, Rein Taaramäe en Francesco Gavazzi bluuft Chavanel over. Deur dan der e masse favorietn evolln zyn, ryen ze nie zêre in 't peletong, woadeure dat 't voun Chavanel simpeler wos voun 'n rit te winn, zyn twiddn in 'n Tour, achter Montluçon in 2008. 't Is e superdag voun Quick-Step, want buutn de joungernboai (Tony Martin), hen ze olles ewonn (rit, gilvn en groenn boai en dagklassement strydlust me Chavanel en de bolletjes me Pineau).

Rit 4 - 6 juli - Thor Hushovd

• Wanze > Arenberg - Porte du Hainaut (207 km)

Van e langn vlucht me zeevn, bluuft ollêne 'n Canadees Ryder Hesjedal over at 'n inhoald is deur en êeste groeptje. 'n Dienn groep is ountstoan up de kossien van Sars-et-Rosières en bestoat uut Fabian Cancellara, Andy Schleck, Cadel Evans, Geraint Thomas en Thor Hushovd, die 'n rit gienke winn in 'n sprint. E twidde groeptje me doarin oundermêer Jurgen Van Den Broeck en Johan Vansummeren, verliest 53 secondn, Contador verliest nog eki 20 secondn mêer. Lance Armstrong rydt plat up e slicht moment en verliest 2 minuutn, Fränk Schleck volt up Sars-et-Rosières en moet upgeevn met e sleutelbêenbreuke. In 'n stand pakt Cancellara 'n gilvn boai were, Evans en Andy Schleck spriengn over Contador in 'n stand. Jurgen Van Den Broeck komt up de tienste plekke.

Rit 5 - 7 juli - Alessandro Petacchi

• Cambrai > Reims (150 km)

E langn vlucht met oundermêer Francis De Greef, is epakt up 3 kilomeiters van de mete en in 'n sprint wint Alessandro Petacchi zyn twiddn rit, vôorn Julian Dean en Edvald Boasson Hagen.

Rit 6 - 8 juli - Mark Cavendish

• Epernay > Montargis (185 km)

Vadoage zyn der drie vluchters, 'n Spanjoard Guttierez van Caisse d'Epargne, Julien El Fares, e Fransman va Cofidis en 'n Quick-Stepper Jurgen Van De Walle, 'n ênigsn West-Vloamienk in 'n Tour. Ze ryen 175 kilomeiters up kop, up 't latste goat Guttierez nog ollêne weg, mo 'n is epakt up e klêne 4 kilomeiters van de mete. In 'n sprint trekt Renshaw perfect an voun Cavendish, die wint vôorn Ciolek en Boasson Hagen. Up 't podium en beisn en interview stoat 'n me de troann in zyn oogn, deur olle kritiek dat 'n in de latste moandn ekreegn hadde.

Rit 7 - 9 juli - Mark Cavendish

• Montargis > Gueugnon (225 km)

't Zyn vadoage Ruben Perez (Euskaltel), Mathieu Perget (Caisse d'Epargne) en Sebastian Lang (Omega Pharma) die achter 3 kilomeiters demarreern en ze pakken 8 minuutn. Dimitri Champion (AG2R) en Anthony Charteau (Bbox) kommn derby up 20 kilomeiters van de mete, mo 't peletong hoald nunder egliek in. In 'n sprint wint Cavendish were, vôorn Tyler Farrar en Alessandro Petacchi. Bachtn de mete gebeurt er nog 't êen en 't ander, Barredo en Rui Costa battern en McEwen bokst teegn etwien en volt. In 'n stand bluuft olles gelyk, ol komt Perget voun de bolletjes up êen punt van Pineau en Petacchi up 4 puntn van de groenn boai van Hushovd.

Rit 8 - 10 juli - Sylvain Chavanel

• Tournus > Station des Rousses (161 km)

't Wos e rit over 6 klemmn, doavan woarn der 2 van twidde categorie. 't Gienkn ol van in 't begun 5 coureurs weg, woavan da bergkeunienk Pineau 't langste overleefde en up d'êeste 5 colletjes puntn pakte. Up 'n latstn klem gienkt er e groep achter Pineau, doavan wos Chavanel 'n bestn, vôorn 'n Catalaan Valls van Footon-Servetto en 'n Spanjoard Garate. In 'n stand volln Cancellara, die zyn gilvn boai verliest an Chavanel, Geraint Thomas en Hushovd uut d'êeste tiene, woadeure dat Van Den Broeck 'n zeevnsn komt en Vansummeren 'n neegnsn.

Rit 9 - 11 juli - Andy Schleck

• Station des Rousses > Morzine-Avoriaz (117 km)

In 'n êestn echtn bergrit krygt Mario Aerts 'n prys voun de strydlust, voun de reste gebeurt er nie ol te vele, ol verliest Lance Armstrong wem 12 minuutn. Up 'n latstn klem goat Van den Broeck weg, mo Contador pakt nem rechtet were, uutendelik is 't Schleck die wegrakt. Contador tracht mei te goan, mo da lukt nie, Samuel Sanchez kut da wel. In 'n sprint wint Schleck, Evans pakt 'n gilvn boai. Van den Broeck schuuft up no de vierde plekke.

Rit 10 - 13 juli - Sandy Casar

• Morzine-Avoriaz > Saint-Jean-de-Maurienne (204 km)

Up de Col de la Madeleine toogn Andy Schleck en Alberto Contador dan ze de twêe beste zyn byn de favorietn. Ze spriengn weg uut 't peletong en pakkn bykan e menute up Samuel Sanchez en mêer of 2 up ol de reste. Evans het zyn arme ebrookn in 'n rit van 'n dag dervôorn en verliest bykan 10 menuutn. Juuste vôorn 'n arrivee groakn Schleck en Contador nog byn de drie vluchters, mo dedie sprintn egliek voun de zege, 'n Fransman Sandy Casar wint vôorn Luis Leon Sanchez en Damiano Cunego. Schleck pakt 'n gilvn boai van Evans of, Jurgen Van Den Broeck het gin te goein dag en verliest e plekke in 't klassement, en is nu 'n vuufdn.

Rit 11 - 14 juli - Sergio Paulinho

• Chambery > Gap (179 km)

Up Quatorze Juillet zittn der twêe Belgn in e kopgroep die mêer of tien menuutn vôorn 't peletong go binnkommn, 't zyn Mario Aerts van Lotto, die ol idder eki meiwos, en Dries Devenyns van Quick-Step. D'aar viere zyn Sergio Paulinho, e Portugees van Radio Shack, 'n Witrus Vasil Kiryienka van Caisse d'Epargne en de twêe Fransche Pierre Rolland (Bbox) en Maxime Bouet (AG2r). Aerts en Devenyns trachtn weg te spriengn up 'n vorlatstn klem, mo ze groakn nie weg. E bitje loater lukt dadde wel voun Paulinho en Kiryienka, in 'n sprint wint 'n Portugees, die doavôorn surtout ekend wos voun zyn twidde plekke up d'Olympische Speeln van Athene.

Rit 12 - 15 juli - Mark Cavendish

• Sisteron > Bourg-lès-Valence (180 km)

In e plattn rit droait olles were uut up e massasprint, doarin wint Cavendisch vôorn Petacchi en Tyler Farrar. Beisn 'n sprint gaf Mark Renshaw, die antrok voun Cavendish, êentige kopstôotn an Julian Dean en ne wêek no of va zyn lyne, de jury het nem doavôorn uut koers ezet.

Rit 13 - 16 juli - Joaquim Rodriguez

• Bourg-de-Péage > Mende (210 km)

Deur mei te goan in e langn vlucht kut Thor Hushovd de tusschnsprintn winn en ezo pakt 'n zyn groenn boai were. Van ol die vluchters overleeft Vinokourov 't langste, e got 'n derdn zyn bachtn Contador, die 10 secondn pakt up de reste, en Joaquim Rodriguez van Katjoesja. Van Den Broeck zit in e groeptje up 10 secondn en bluuft up de vuufde plekke stoan in 't klassement, Schleck zit oek in da groeptje en houdt 'n gilvn boai.

Rit 14 - 17 juli - Alexandre Vinokourov

• Rodez > Revel (195 km)

In e redelikkn plattn rit goan der drie coureurs weg, de Fransmans Pierrick Fédrigo en Sylvain Chavanel en 'n Spanjoard Juan Antonio Flecha, ze paktn êentige menuutn. De ploegn van de sprinters wuldn e massasprint en begustn te ryen, de drie kustn 't uuthoudn toet up 9 kilomeiters van de mete. Up 7 kilomeiters leit er nog e klem van derde categorie, 'n Italioander Alessandro Ballan, oud-weireldkampioen, wos 'n êestn voun te spriengn, mo ne wos were-epakt deur Alexandre Vinokourov, Kazak en nog mo juuste were achter dat 'n twi joar eschorst wos voun bloeddopieng. 't Peletong joagde, mo Vinokourov hield het uut en won zyn vierdn Tourrit met 13 secondn vôorn up de reste, woavan dat Cavendish won vôorn Petacchi, die 'n groenn boai werepakt van Hushovd.

Rit 15 - 18 juli - Christophe Riblon

• Revel > Ax-3 Domaines (184 km)

Van e langn vlucht met oundermêer Jurgen Vandewalle, bluuft up 'n latstn klem no Ax-3 Domaines ollêne Christophe Riblon van AG2r over, e wint met bykan e minute vôorn up Denis Menchov en Samuel Sanchez. Riblon is e redelikkn ounbekendn Fransman, die mor up 24 prof is ekommn achter dat 'n in 2004 Frans kampioen byn de liefhebbers wos. D'aar favorietn kommn nog eki 15 secondn loater an, doaby zat oek Jurgen Van den Broek, die up de vuufde plekke bluuft stoan. Van de gastn achter nem verliezn Leipheimer, Basso en Luis Leon Sanchez over.

Rit 16 - 19 juli - Thomas Voeckler

• Pamiers > Bagnères-de-Luchon (187 km)

't Is were e langn vlucht met doarin oundermêer Thomas Voeckler, 'n Franschn kampioen, Johan Vansummeren en oud-weireldkampioen Alessandro Ballan. Up 'n latstn klem lat Voeckler ze ollemoale achter en wint zyn twiddn rit in 'n Tour. Ballan is nog vôorn de groep met Contador 'n twiddn vôorn Aitor Perez. Up 'n Port de Balès hadde Andy Schleck rôoi me zyn keetn at 'n an 't attakeern wos, woadeure dat Contador kuste wegryen met Samuel Sanchez en Denis Menchov, die e bitje mêer of en hoolve minute pakkn up Schleck, Van den Broek en Vinokourov. Schleck verliest zyn gilvn boai, Van den Broek bluuft up de vuufde plekke en pakt tyd up ol dedie die bachtn nem stoegn.

Rit 17 - 20 juli - Pierrick Fédrigo

• Bagnères-de-Luchon > Pau (196 km)

In e rit over 'n Peyresourde, 'n Aspin en 'n Aubisque rocht er e groep van 8 weg. In dienn groep zaatn Jurgen Van de Walle en Carlos Barredo van Quick-Step, Lance Armstrong en Chris Horner van RadioShack, Sandy Casar van FDJ, Pierrick Fédrigo van Bbox, Ruben Plaza en Christophe Moreau van Caisse d'Epargne en Damiano Cunego van Lampre. Up 'n top van 'n Aubisque woarn der nog 60 kilomeiters te ryen, Barredo gienk up e kilomeiter of 40 van de mete. En hield het bykan uut, juuste vôorn de mete wos 'n inhoald. In 'n sprint wos 't Fédrigo die won, zyn derdn tourrit ôois. Byn de favorietn gebeurde der nie vele, in 'n stand bluuft olles gelyk.

Rit 18 - 22 juli - Andy Schleck

• Pau > Col du Tourmalet (174 km)

't Goan zeevn coureurs weg, z'houdn 't uut toet up 'n latstn klem, 'n Tourmalet, woa dan ze voun 'n twidde kêe en ankomste houdn, in 1974 won 'n Fransman Danguillaume. Byn die zeevn zittn Flecha en Boasson Hagen van Team Sky, Koren van Luiquigas, Burghardt van BMC, Perez van Euskaltel en Kolobnev van Katjoesja. Up 'n Tourmalet is 't Kolobnev die 't langste wegbluuft en is estekt deur Andy Schleck, die edemarreerd is up 10 kilomeiters van de mete, en Alberto Contador, 'n ênigstn die meikuste. Ze probeern olletwêe nog te spriengn, mo 't lukt nie voun weg te groakn. 't Komt oek nie echt e sprint, Schleck bolt êest over de mete, Contador bluuft 8 secondn vôorn in 't klassement. Van den Broeck zit in e twiddn groep, mo moet up 't latste lossn en e verliest e klêne hoolve menute up Joaquim Rodriguez en e seconde of 8 up Gesink, mo ne bluuft wel goed up de vuufde plekke. De bolln zyn zeker van Charteau, niemand ku nem nog inhoaln.

Rit 19 - 23 juli - Mark Cavendish

• Salies-de-Béarn > Bordeaux (190 km)

Van de vier vluchters Pineau, Vaugrenard, Breschel en Oss, blêef 'n Italioander 't langste weg, toet up 4 kilomeiters van de mete. In 'n massasprint wos 't Cavendish die voun 'n vierde ki won, vôorn Julian Dean. Petacchi wo 'n derdn, Hushovd mo 'n vêertiendn, ezo verliest 'n Nôor zyn groenn boai.

Rit 20 - 24 juli - Fabian Cancellara

• Bordeaux > Pauillac (51 km - tydrit)

'n Rôon lanteirn Bert Grabsch rêde rechtet e goein tyd, e wos 'n derdn in 'n uutslag. 't Wos en aarn Duutscher die êest ounder Grabsch zyn tyd gienk, Tony Martin, e menute 'n hoolf. Cancellara, die weireldkampioen is in 't tydryen, gienk doa nog eki 17 secondn ounder. Byn de favorietn beguste Schleck beter of Contador, mor up 't ende wos 't egliek 'n Spanjoard die nog en hoolve menute pakte en ezo zyn derdn Tour go winn. Mensjov pakte nog de derde plekke of van Samuel Sanchez, Van den Broek bluuft up de vuufde plekke stoan, 'n êeste kêe dat e Belg dat kut sedert Claudy Criquielion in 1986. 'n Bestn Belg in 'n tydrit wos Maxime Monfort up de 14e plekke.

Rit 21 - 26 juli - Mark Cavendish

• Longjumeau > Parys (160 km)

Lik ossan wos er vele leute in 't begun van d'etappe: de fotografen miekn fotootjes van de coureurs mi champagne in nunder handn. By 't noazn van Parys begost 't echt. Op de Champs-Elysées wos 't er lange een ontsnapping, moa lik bykan ossan kwam 't an de mete were ollemoale tope. Mark Cavendish won in 'n sprint me de spreekwôordelikke vingers in de neuze.

Overzicht klassementn

Rit	Winnoare	Stand Gilvn boai	Puntn Groenn boai	Bergkeunienk Bolletjes	Joungernklassement Wittn boai	Ploegnklassement Gilf nummer	Strydlust Rôod nummer
1	Fabian Cancellara	Fabian Cancellara	Fabian Cancellara	Gin bergprys	Tony Martin	Radioshack	Gin prys
2	Alessandro Petacchi		Alessandro Petacchi				Maarten Wynants
3	Sylvain Chavanel	Sylvain Chavanel	Sylvain Chavanel	Jérôme Pineau		Quick-Step	Sylvain Chavanel
4	Thor Hushovd	Fabian Cancellara	Thor Hushovd		Geraint Thomas	Team Saxo Bank	Ryder Hesjedal
5	Alessandro Petacchi						Dimitri Champion
6	Mark Cavendish						José Guttierez
7	Mark Cavendish						Mathieu Perget
8	Sylvain Chavanel	Sylvain Chavanel			Andy Schleck	Astana	Jérôme Pineau
9	Andy Schleck	Cadel Evans				Rabobank	Mario Aerts
10	Sandy Casar	Andy Schleck		Anthony Charteau		Caisse d'Epargne	Luis Leon Sanchez
11	Sergio Paulinho			Jérôme Pineau			Mario Aerts
12	Mark Cavendish		Alessandro Petacchi				Stéphane Augé
13	Joaquim Rodriguez		Thor Hushovd	Anthony Charteau		RadioShack	Alexandre Vinokourov
14	Alexandre Vinokourov		Alessandro Petacchi				Juan Antonio Flecha
15	Christophe Riblon					Caisse d'Epargne	Christophe Riblon
16	Thomas Voeckler	Alberto Contador				RadioShack	Thomas Voeckler
17	Pierrick Fédrigo		Thor Hushovd				Carlos Barredo
18	Andy Schleck						Alexander Kolobnev
19	Mark Cavendish		Alessandro Petacchi				Daniel Oss
20	Fabian Cancellara						Gin prys
21	Mark Cavendish
Uutslag		Alberto Contador	Alessandro Petacchi	Anthony Charteau	Andy Schleck	RadioShack	Sylvain Chavanel

Eindklassementn

Gilvn boai

	Coureur	Ploeg	Tyd
1	Alberto Contador (SPA)	Astana
2	Andy Schleck (LUX)	Team Saxo Bank	+ 0'39
3	Denis Menchov (RUS)	Rabobank	+ 2'01
4	Samuel Sanchez (SPA)	Euskaltel-Euskadi	+ 3'40
5	Jurgen Van Den Broek (BEL)	Omega Pharma-Lotto	+ 6'54
6	Robert Gesink (NED)	Rabobank	+ 9'31
7	Ryder Hesjedahl (CAN)	Garmin-Transitions	+ 10'15
8	Joaquim Rodriguez (SPA)	Team Katjoesja	+ 11'37
9	Roman Kreuziger (TSJ)	Luiqigas-Doimo	+ 11'54
10	Chris Horner (VS)	Team Radioshack	+ 12'02

Groenn boai

	Coureur	Ploeg	Puntn
1	Alessandro Pettachi (ITA)	Lampre-Farnese	243
2	Mark Cavendish (GB)	Team HTC-Columbia	232
3	Thor Hushovd (NOO)	Cervélo	222

Bolletjes

	Coureur	Ploeg	Puntn
1	Anthony Charteau (FRA)	Bbox Bouygues Telecom	143
2	Christophe Moreau (FRA)	Caisse d'Epargne	128
3	Andy Schleck (LUX)	Team Saxo Bank	116

Wittn boai

	Coureur	Ploeg	Tyd
1	Andy Schleck (LUX)	Team Saxo Bank
2	Robert Gesink (NED)	Rabobank	+ 8'52
3	Roman Kreuziger (TSJ)	Liquigas-Doimo	+ 11'15

Ploegnklassement

	Ploeg	Tyd
1	Team Radioshack
2	Caisse d'Epargne	+ 9'15
3	Rabobank	+ 27'48