Via Appia

De Via Appia (vertoald: "De boane van Appius") es êen van belangrykste oude Romeynsche heirboan'n uut den Klassiekn Oudeyd, tôope mè de Via Latina, de Via Flaminia en de Via Salaria. De Via Appia liep van d'n ôofdstad Rome richtienge 't zuudn, êest dichte by de westkust van 't Itoalisch schiereyland tout in Capua woa 't licht ofboog noa 't zuudôostn tout in Brundisium ('t uudige Brindisi) an d'Adrioatische Zêe. Je kunt 't ôorsprounkelyke tracée dervan nog toamelyk schôone ziene ip boanekoartn van 't uudige Itoalië.

De Via Appia ip koarte (in't rôo gekleurd)

Via Appia by Quarto Miglio

D'n anleg van de Via Appia wierd in 312 v.C. begonn'n ip besluut van Appius Claudius Caecus, noar wien da de boane genoemd es. Je wierd angeleyd bist de Twidde Samnitische Oorloge vo 't leeger rapperder te kunn'n verplatsn, mo 't wierd mè tyd ôok e vrêe belangryke boane vo de commerce en vo 't vervoer van mienschn en produktn tusschn Rome en Campanië en vodder noa d'Adrioatische Zêe en 't ôostn van de Middellandse Zêe. Mè da de Via Appia ezo importantig wos, a ze ôok de bynoame regina viarum in't Latyn ("de keuninginne van de boan'n").

Ofbeeldiengn die ier by passn ku je vien in de categorie Via Appia van Wikimedia Commons.