Ôostrliengn-pling (Brugge)

Dat artikel es geschreevn in 't Noordelik West-Vlams.

't Ôostrliengn-pling is e pling in Brugge. 't Ôostrliengn-pling is verboenn mê de Woensdagmart, de Spoansche Loskoaje en 't Krom Gent-'of.

Geschiednisse

Noast de veele Zuud-Europeesche noasjes die iedr undre "noasj'-uus" addn in Brugge, woarn dr ook de kommêrsantn uut d' Ôost-Europeesche landn. Zydre woarn mê mindre en ook mindre an bepoalde noasje-steedn verboenn, zodoanig da ze verêenigd woarn in de Hanze, undre lik êen gehêel groepeerden en êen ienkle uus vo centroale vergoadr-platse addn. In 1451 woarn die gastn zo miskontênt oovre de gank van zoakn in Brugge dat ze beslôotn vo nor Utrecht en Antwerpen te veruuzn. 't Was de vuufde kêe da d' oentevreen Hanzeoaten Brugge verlietn: oltyd weere zoatn ze strop mê d' ekonoomiesche realiteit mor ook deur de toegeeviengn van 't stadsbestier wast vôordêeligr van undre karre te kêern. E belangryke Brugsche dillegoasje rêed achtre undre an in 1457 vor undre van gedacht te doen verandrn. Dr wierdn undre verschillnd intressante vôorwoardn angeboon. Nie 'te minste was da z' ip de kostn van Stad Brugge e splintreniew stadspaleis zoenn krygn. Ze lietn undre poajn, kwoamn weere en 't "Uus van d' Ôostrliengn" wierd gebowd. 't Lag an den achtrekant teegn de Spoansche Loskoajo, woa da de bôotn kostn anleggn en marchandieze koste geloan en gelost wordn. In 1478 wierd 't bestoande gebow da vor e dêel van oet was, ofgebrookn en wierd oendre de leidienge van Jan van den Poele 't niewe monumentoale Ôostrliengn-uus gebowd da in 1481 grêed kwam. 't Uus wierd lik e byzoendre gesloagd monument gepreezn en wierd deur de schildre Pieter Claeissens ipgenoomn ip 't schildery dat y in 1560 wydde an de Zeevn Woendrs van Brugge.

Vôo 't gebow wierd 'n oopnboar pling angeleid, woavôorn datr zeifs 'n uus moste sneuvln. 't Gebow ligt min of mêer ip den uutoek van 't pling en êt 'n uusnummre in 't Krom Gent-of.

E bitje voddre kykn

(nl) De Smidt, Firmin 1948 : Het Oosterlingenhuis te Brugge en zijn ontwerper Jan van den Poele, Antwerpen.
(nl) Schoueet, Albert 1977 : De straatnamen van Brugge. Oorsprong en betekenis, Brugge.
(nl) Buyle, Marjan 1993 : Het plafond van het Oosterlingenhuis te Brugge, in : Monumenten en Landschappen, p. 54-57.
(nl) Vandewalle, André (red.) 2002 : Hanzekooplui en Medicibankiers. Brugge, wisselmarkt van Europese culturen, Brugge.