Dagpauwoge

E dagpauwoge up e vlienderstruke

Ryk:	Animalia (Bêestn)
Stamme:	Arthropoda (Gelêedpôtigen)
Klasse:	Insecta (Insectn)
Orde:	Lepidoptera (Vlienders en mottn)
Familie:	Nymphalidae (Aurelia's of edelvlienders)
Geslacht:	Aglais

Sôorte

Aglais io

Dagpauwoogn ( Aglais io) zyn êen van de bekendste sôortn vlienders deur de typische pauwoogn die up ze vlerkn stoan.

Uutzicht

Inachis io

Dagpauwoogn hen e spanwydte tusschn de vuuf en zes cantimeiters. 't Hoofdkleur van de vlerkn is rôod-bruun, 'n bôord van de vlerkn is bruun van kleur.

't Zyn surtout de blauw-gilve en de blauw-zworte plekkn die upvolln. Ze trekkn up d'oogn die oek up 'n steirt van d'hoans van pauws stoan. Ze dienn wel ollêne voun grodder bêestn te doen verschietn. Ze toogn nunder oogn ollêne an ze benauwd zyn en zyn zêre voun weg te vliegn.

'n Ounderkant van de vlerkn is zwort.

Verspreidienge

Dagpauwoogn zyn vlienders die in verre hêel Europa leevn (buutn 't nôordn en stikkn van Spanje, Portugal en Grieknland) en in Azië toet in Japan.

't Zyn gin zindelikke bêestn, want ze kommn verre overol vôorn, toet en hogte van 2500 meiters. Ze leevn in busschn, wêen, parkn en hovetjes, an der mo bloemn enoeg zyn.

Leevn

E rupse

't Zyn vlienders die overwientern up warme plekkn en doadeure mêestol vroeg in 'n uutkom ol actief zyn. Ze zittn up olle sôortn bloemn, in hovetjes kommn ze vele up struukn met e masse bloemn. Ze zoekn nectar up wulgn, kloavers, klakkebussn, marjolein en aar plantn me vele bloemn. Z'eetn ook oltemets zop van boomn en vort fruut.

Achter dan ze epoard hen, legt 't wuvetje eiers in groeptjes van 50 toet 200 up plantn lik surtout bytenittels, aar nittels en hommel. De rupsn zyn zwort me klêne witte bolletjes en z'hen ollemoale stekkers. Achter e moand achter dan ze uut nunder ei ekroopn zyn, verpoppn z'ol.