Belgisch bier

Belgisch bier is weirldbekend, en voa zo'n klêen land zyn d' er vrê veel diverse sôortn bier, variërend van geweune pils toet an Trappist en de fruutbiern. Der zyn omtrent 125 brouweryn in België, goande van de brouwersgigant InBev toet an de platselike streekbrouweryn. Ollêene Duutsland, Vrankryk en Iengeland ên mêer brouweryn.

Westvleteren trappist, gebrouwd in West-Vloandern

Geschiedenisse

Voa zoverre dan we weetn is bier in België gebrouwd gewist sinds de Middelêeuwn. 't Er wordt gepeist dat in dien tyd bier wier gebrouwn in d' abdyn, mô da was wel nie de Trappistbiern, angezien dan de Trappistn pas mô de Franse revolutie nô België zyn gekommn.

Distributie

Cafés

België êt duzenden cafés, wôdan zels de klêene stamcafés een goeie selektie ên, binst dan de cafés die der under up specialiseern, gelik de "Garre van Kornee" in Brugge of de "Dulle Griet" in Gent, mêer dan vuufhounderd sôortn ên.

Flestjies en van 't vat

Beholve de geweunen pils, têrwebier of platselike specialiteitn gelik Keuninkstjie van Antwerpn of Palm van Londerzêele, die mêestol van 't vat kommn, word Belgisch bier over 't olgemêen uut flestjies geschoenkn.

Gloazn

Bier van 't vat kom mêestol in 25 cl gloazn, binst dan de biern van 't flestjie over 't olgemêen een glasmoate ên da by 't flestjie past. Ieder merk è zyn eign sôorte gloazn, met een specifieke vorm, en under eign name en logo derup.

Internationaole distributie

Sommige biern geproduceerd deur Inbev, gelik Stlla Artois, Hoegaarden of Leffe wordn verre g'exporteerd, en kunn'n in veel landn in Europa gevoundn wordn. De mêest andere merkn zyn oftewel beperkt toet België, of mô juste in specioalzaakn in 't butenland te viendn.

Trappistbiern

Twêe flessn Westmalle Tripel

Olhoewel dan de Trappistn achter de Franse revolutie nô België kwaamn, ê toet an 1836 gedeurd vôdan ze beginn'n brouwn ên (in Westmalle), en toet an 1861 vôdat het publiek verkocht wierd. Vô erkend te wordn as een Trappist, moet het bier in of dichte teegn den abdy gebrouwd wordn, moetn de poaters aktief by 't brouwn betrokkn zyn, en moet d'inkomste vô 't grotste dêel nô d' abdy goan. Westvleteren is den êenigsten West-Vlamschen trappist, mô 't is ook êen van de mêest exclusieve.

In imitaotie van de trappistbiern, wordn der veel abdybiern gebrouwd deur commerciêle brouwers die een licentie up d' abdyname ên, en 't grôotndêel dervan zyn dubbels of tipels, gelik de mêeste trappistbiern.

Belgische biersôortn

Pils

't Ordinêr pintje mak het grotste dêel van de Belgische bierproduktie uut. De mêeste merkn, beholve Stella Artois, zyn buutn België mô winnig bekend.

Pale ale

Minder courant dan in 't verleen, merkn gelik Whitbread of Martin's Pale Ale zyn Iengelse biern die gemakt zyn met 't oge up den Belgischen markt. Ze zyn wel minder populair met den upgang van andere biersôortn in de latste tientalle joarn.

Amber ale

Biern gelik Dekoninck, Palm of Vieux-Temps zyn een alternatief voa mensn die de hoppesmake van de geweune pils nie zô gêrn ên. Under distributie is dikwils mêer beperkt dan de normale pilstjies.

Blonde ale

Duvel

Duvel is een typische sôorte Belgisch blonde ale, en internationoal 't beste bekend. 't Is azô genoemd omdat 't zoete binnenlôopt, mô stravver is dan dajje êest peist. Andere merkn gelik Mort Subite of Delerium Tremens zyn misschien wel minder bekend, moa dôvôorn nie minder goed.

Têrwebier

't Sôorte bier dat in Vloandern in the Middelêeuwn wier gebrouwd vô de geweune mens, en was gemakt van een miengsel van têrwe en gerst vôda hoppe mêer olgemêen beschikboar wier. Hoegaarden is nu internationoal 't beste bekend têrwebier.

Dubbel / Tripel

Dubbel êt een typische dounkerbruune kleur. 't Is êen van de klassieke trappist/abdybiersôortn met een alcoholgehalte van 6% toet 8%. Tripel is traditionêel de strafste sôorte Trappist, met toet 9% alcohol. Over 't olgemêen is 't een blond bier, olhoewel da Westvleteren en Rochefort dounker zyn. Brugse Tripel en Straffe Hendrik zyn twê sôortn tripel die in Brugge wordn gebrouwd.

Vlamsch rood

Een typisch vôorbêeld is Rodenbach, een biertjie da hêel apart stoat van de reste van de Belgische biersôortn, mê zyn rôo kleur en zyn zeure smake.

Hopbier

Een klêen aantal Belgische biern leggn der under up toe van de hopsmake te versterkn, gelik 't Hommelbier van Poperinge.

Lambic

't Beste bekend van Gueuze Lambic en Krieke, môr ook deur fruutbiern gelik Lambic Framboise.

Tafelbier

Tafelbier is een lêeg-alcohol bier (typisch nie mêer dan 1.5%) da wier verkocht in grôote flessn vôr an tafel te drienkn met 't eetn. Teegnwôordig zyn ze veel minder populair, omdat de mêeste mensn nu limonade of spuutwoater by 't eetn drienkn.