Hoofdmenu openen
't Embleem van de Bosoniedn

De Bosoniedn woarn e dynastie van Frankische eedeln die e belangryke rolle gespeeld hen binst de periode van de Karoliengers in de 9e en de 10e êeuwe. De stamvoader was Boso den Oudn.

Der woarn groavn, hertoogn, bisschoppn en ridders by en uutendelik trouwdn ze in de keunienklyke familie van de Karoliengers en produceerdn z'ook keuniengn en zelfs e keizer.

Den êeste belangrykn telg was Boso van Provence, e zeune van Bivinus van Metz. Je was getrouwd met Ermengarde, dochter van keizer Lodewyk II. Zyn zuster Richildis was getrouwd me keizer Karel II, en zyn broere Richard was den êestn hertog van Bourgondië.

Zyn schonbroere Karel II was den ipvolger van Lodewyk II en je benoemde Boso in 876 in Pavia toet hertog en ounderkeunienk van Italië en hertog van Provence. Achter 'n dôod van Karel II zyn zeune Lodewyk den Hakkeloare wildn de eedeln van Provence zyn twi zeuns Lodewyk en Karloman nie anveirdn ols keunienk van Provence en ze koozn Boso in de plekke.

Zyn keunienkryk Lêger-Bourgondië (of Cisjuranië) wierd gesticht mè Vienne ols hoofdstad. Boso stierf in 887 en zyn zeune Lodewyk voldeg' hem ip. Je was Rôomse keizer ols Lodewyk III tusschn 901 en 905. Achter e misluktn invoazje van Italië liet zyn rivoal Berengar van Friuli zyn oogn uutstekkn in Verona en je most werekêern no zyn hoofdstad Vienne. Je wierd in 928 ipgevolgd deur Hugo van Arles, die ol zyn adviseur en regent was van in 905 omdat Lodewyk van ton blend was. Hugo verplatste den hoofdstad van Vienne noar Arles en trouwde me Willa, een half-zuster van Lodewyk den Blendn.

De Bosoniedn han me Rudolf/Raoul, zeune van Richard van Bourgondië, ook e Fransche keunienk. Je volgdeg' êest in 921 zyn voader ip ols twiddn hertog van Bourgondië. Je trouwde met Emma, dochter van de Fransche keunienk Robert I, die in 923 deur zyn schonzeune ipgevolgd wierd.

Wikimedia Commons