D'heern van Gistel
D'heern van Gistel hen lange tyd een belangryke rolle gespeeld in 't groafschap Vloandern en ook in 't middeleêuws Brugge. 't Woarn oorsprounkelik erfelikke koamerheern van de groaf van Vloandern.
In de 13e eêuwe kreêgn ze 't tolrecht in Brugge in leên van de groaf. ’t Was e deurvoerrecht die betoald most wordn deur de schippers die Brugge binn kwoamn langs de Langereie en de Spegelreie, een belastienge ip de goedern. Deur 't heffn van die tol kwoamn d'heern van Gistel styf ryke.
In 1411 gaf den hertog van Bourgondië Jan zounder Vrees de stadsrechtn van Gistel an Jan VI van Gistel, die zen twi zeuns overleefde. Doadeure volgde zen dochter Isabella van Gistel hem ip. Ze trouwde met een heere van Luxemburg en azo gerakte de familie van Gistel verboundn mè de familie van Luxemburg en Vendôme.
Pieter van Luxemburg bouwde in 1477 't Tolhuus ip de Jan Van Eyckplatse, ton nog de Sint-Jansbrugge genoemd.
De latstn die den titel van heere van Gistel droeg was Antoon van Luxemburg, die in 1543 deur Keizer Karel V gevangn gezet wierd, by de verdedigienge van Ligny. Vo de losprys te kunn betoalen most ie eênigte van zen bezittiengn w.o. Gistel verkoopn. In 1545 wierd de Baronie van Gistel verkocht an de familie van Gian Carlo Affaitati, ryke Italioann ofkomstig van Cremona die under in Antwerpn gevestigd haan. Ze bleêvn boas van Gistel tout an de Fransche Revoluusje.
’t Hof van Gistel
bewerknD'heern van Gistel weundn ol van in de 13e eêuwe in Brugge in 't Gistelhof, geleegn in 't Zilletje (Sint-Gillis). De noame van de stroate veranderde loater in Hoedenmakersstroate, mo de drie stroatn der round hen nog ossan de noame Noord-Gistelhof, Oost-Gistelhof en West-Gistelhof.
In 1275 kwoamn de poaters Augustynen in under domein en d'heern van Gistel verhuusdn no 't center van Brugge. Ze lietn een huus bouwn met een ountvangbureau in de Ontvangersstroate, vo t'inn van tolgeldn. De stroate lag e staptje van 't verbluuf van de groaf, 't loater Prinsenhof.
In de 15e eêuwe liet Antoine de Bourbon, hertog van Vendôme en heere van Gistel, zyn domein 't Hof van Gistel bouwn in de zelste stroate van 't Hof Bladelin, woa da de Florentynsche Medicibank gevestigd was, en van 't consuloat van de Lucceezn. 't Lag an de Noaldestroate en de Sint-Jakobsstroate, e staptje van 't Hof de Gros. Pieter Bladelin en Jean de Gros, heern die in now contact stoundn mè d'hertoogn van Bourgondië, woarn gebeurs.