Gistl'of

Dat artikel es geschreevn in 't Noordelik West-Vlams.

't Gistl'of (Needrlans : Gistelhof), mê 't vôorzetsle Nôord-, Ôost- of West-, is de noame van drie stroatn in Brugge.

Geschiednisse

De stroatn dankn undre noame an d' Êern van Gistle. In de beurt lag in de 13ste - 14ste êewe undre oofverbluuf in Brugge, 't Of van Gistle. Undre oofbronne van inkomsten lag ook niet zo verof, noamlik de Grôote Tol aan de Sint-Jansbrugge. De stroate van undre reeziedensje wierd 't Gistlof, mo de noame veranderde achtre da de famielje van Gistel no de Noaldestroate was veruusd. De niewe noame wierd Oedemoakrstroate. Mo de drie stroatn die dr roend loagn blêevn undre noame oedn: 't "Nôord-Gistl'of", 't "Ôost-Gistl'of" en 't "West-Gistl'of".

't Nôord-Gistl'of lopt van Moagdndal no de Sterrestroate, 't West-Gistl'of van de Augustynereie no 't Nôord-Gistl'of en 't Ôost-Gistl'of van d' Augustynereie no de Sterrestroate.

E bitje voddr kykn

(nl) Schouteet, Albert 1977 : De straatnamen van Brugge. Oorsprong en betekenis, Brugge, ISBN 9789062675036.
(nl) beernaert, Brigitte e. a. 2000 : Oost-Gistelhof 2, Den Bonten Hont, in : Monument en Tijd, Open monumentendagen Brugge 2000, Brugge.