Duunkerke-Zuud

Duunkerke-Zuud es e stadsdêel van de Franschn stee Duunkerke da ande zuudkant van Duunkerke-Centrum ligt. Duunkerke-Zuud it en ippervlakte van 1,1 vierkante kilomèiters en telt bikkans 7000 inweuners. 't Ligt tusschn 't verbindiengskanal in d'oude binn'nhoavn, de gemêente Nieuw-Koukerke, Klêen-Sintn en Sint-Pols.

Duunkerke-Zuud (in't poars) ip e koarte van Duunkerke

Wykn in Duunkerke-Zuud

De wykn van Duunkerke-Zuud

Basse Ville

De wyk Basse Ville es ountstoan in 1662 deur de bouwe van e nieuwe fortifikoasje deur Vauban ande zuudkant van Duunkerke. D'oorsprounkelyke bedoelienge wos vo der de matrôozn van de scheepn (tydelyk) t'uusvestn. In 1743 wierdn Duunkerke-Centrum en Basse Ville binn'n dezelfde fortifikoasjes geplatst, oloewel da de twêe van mekoar geschêedn zyn deur't verbindiengskanal. In 1864 wierd er de Sent-Moartnskerke gebouwd. In die tyd begoestn der em ôok teffrente fabriekn der ulder te vestign. Deur et groavn van't ofvoerkanal ("canal exutoire") in 1929 ip de plekke van d'oude stadswalln wierd da kanal de zuudergrenze vande wyk. De wyk wos êen van d'êenigste van Duunkerke die byst den Twiddn Weireldoorloge bikkans nie beschoadigd es gewist.

Jeu de Mail

De wyk it zyn noame van e construuksje uut de zestiende êeuwe die diende vo e spel te speeln gelykend ip't koatsspel ("jeu de paume") mo ton wel me nen outn oamer: malie ofte "jeu de mail". In 1666 lag 't groundgebied van d'uudige wyk Jeu de Mail, dad em tusschn de Hoavndyk en de Broekburgvoart bevindt, ande buutnkant van de stadswalln en ôordiget by Nieuw-Koukerke. Et terring diende lyk anlegplekke vo de bôotjes die na Bergn en Sint-Omoars voern. In de neegntiende êeuwe begoestn der em verschilligte fabriekn lyk leerlôoiery'n en wossery'n under der te vestign. In 1850 wierd et nôordn van da groundgebied by Duunkerke gestookn ip instigoatie van de tonmoalige Fransche keunienk Louis-Philippe I. Die moatregel zorgde in tydde vo êenigte rivaliteyt tusschn d'inweuners van Duunkerke en dedie van Koukerke, surtout van de latstgenoemde omda zydder zeidn da Duunkerke e commerciël belangryk stik ground van under ad ofgepakt.

Carré de la Vieille

De wyk Carré de la Vieille ligt tusschn de Broegburgvoart en Klêen-Sintn en it en gelykoardige geschiedenisse lyk dedie van de wyk Jeu de Mail. Vôorn de construksje van de fortifikoasjes ôordiget by Klêen-Sintn, mo vanof den bouw vande stadswalln wierd et iervan ofgesneed'n en wierd et by Duunkerke gevoegd.

Île Jeanty

De wyk Île Jeanty ligt tusschn 't stoasjekwartier en Sint-Pols, an't ende vande Broekburgvoart.

• 
  La Basse Ville.
• 
  Carré de la Vieille.
• 
  Jeu de Mail.
• 
  Île Jeanty.