E40

Den E40 is een otostrade die over het West-Vlams groundgebied lôopt. De 'E' in de noame wyst ip het feit dat het om een otostrade goat die ipgenomen is in het Europese système van otostraden. Vôor 1986 werd ie de E5 genoamd, na de rationalisaotie van noamn van Europeese otostrades E40. 't Is êen van de belangrykste West-Vlamse verkêersassn, tegoare met den E17 en den E403. J'is angeleid in verschillende faasn: 't stik tussen Luuk en Jabbeke is angeleid tussn '37 en '40 en tussn '50 en 56', 't stik tussn Veurne en Jabbeke is't er vele loater gekoomn: tussn '73 en '85 ein ze't angeleid. De E40 is de oedste otostrade van België.

Den E40

Den E40 in België

Den E40 in Jabbeke

De E40 is een lange otostrade, wel 8000 km lang. In België volt ie tôpe met de Oôst-West asse, die Luuk, Brussel en de Vlamse Kust verbindt. 't Es een hêel drukke otostrade, in de weeke zit ie vul me pendelairs noa Brussel toe (de files tussn Affligem en Ternat zyn structureel, wa wil zegg'n dat ze bykans iedern dag vôorkoomn), ip warme doagn zit de E40 vul in de richtienge van de kust omda ol de menschen van't binnland noa de zêe willn. Dad is logisch, omdat ie deur z'n liggienge (hêelegans parallel an de kust) een ideole maniere is om de mêeste kuststeed'n te bereik'n.

West-Vlams traject

De E40 komt de provincie van West-Vloandern binn'n in Beirnem (vanut Brussel gezien), lôopt hêelegans via Brugge noar de Franse grenze in Adinkerke (De Panne). Ie volgt grôtendêels het traject van de A10 en de A18. De belangrykste gemêentn langst z'n (West-Vlams) traject zyn:

• Beirnem (1 ofrit)
• Ôostkamp (1 ofrit)
• Brugge (4 ofritten)
• Jabbeke (1 ofrit)
• Oedeburg (1 ofrit)
• Zandvôorde (Ostende) (1 ofrit)
• Ostende (1 ofrit)
• Gistel (1 ofrit)
• Middelkerke (1 ofrit)
• Nieuwpôort (1 ofrit)
• Ôostduunkerke (Koksyde) (1 ofrit)
• Veurne (1 ofrit)
• Oadinkerke (De Panne) (1 ofrit)
• Franske grenze

Der wordt dikkers gepeisd dat de E40 d'autostrade van Oostende noa Brussel is, mo da's nie 100 procent juuste. Gelik da j' ierboovn ku zien, buugt de E40 uut binneland ter ôogte van Jabbeke of noa 't zuud'n noa Vrankryk. 't Stikske autostrade da in 't verlengde in Jabbeke deurelopt nor Ostende zelve, is gin E40 mi, moar èt allêene 't Belgisch nummer A10.

Europees traject

Zoals gezeid es de E40 êen van de langere Europese otostraad'n. Ie lôopt hêelegans van't Oôsten van Europa (Ridder in Kazachstan) en lôopt ozô via Kazachstan, Rusland, Oekraïne, Pooln, Duutsland via België noa Vrankryk (eindpunt Calais). 't Es een typische Oôst-Westverbindienge.

Varia

De winkelkeetn E5-mode eit zinne noame gekreegn van de E5 otostrade.

Ofbeeldiengn die ier by passn ku je vien in de categorie E40 van Wikimedia Commons.