Frédéric Chopin
Frédéric François Chopin, geboorn Fryderyk Franciszek Chopin (Żelazowa Wola, 1 moarte 1810 – Parys, 17 oktober 1849), was e Poolsche compositeur en pianovirtuoos uyt de romantiek die surtout schreef vo pianosolo.
Chopin wierd geboorn in Żelazowa Wola in 't hertogdom Warschau en je groeide ip in Warschau. Je was de zeune van e Poolsche moëder en e g'emigreerde Fransche voader. Je was e woenderkynd ip de piano. Je kreeg zyn muzikoale ipleidynge in Warschau en je composeerde doar ook zyn vroegste werkn. An zyn 20 joar verliët ie Pooln en ip 21-joarige leeftyd giengt ie in Parys weunn. Je verdiënde zyn brood deur zyn composiesjes te verkoopn en deur pianolesse te geevn, woar dat er vele vroag achter was. Chopin was bevriënd mè Franz Liszt en je wierd bewoenderd deur vele andere muzikantn en componistn van zyn tyd.
Achter e mislukte verlovynge met artiste Maria Wodzińska van 1836 toet 1837, oenderhield ie tusschn 1837 en 1847 e stormachtige reloasje met de Fransche schryfster George Sand (Aurore Dupin). 't Grotste deel van zyn leevn verkeerde Chopin in zwakke gezoendheid. Je stierf in Parys in 1849 ip 39-joarige leeftyd, verzekers an pericarditis verergerd deur tuberculose.
Belangrykste werkn
bewerkn- 21 Nocturnes vo piano, woarvan drië postuum
- 24 Preludes vo piano
- 24 Etudes vo piano
- 69 Mazurka's vo piano, woarvan 58 gepubliceerd
- 17 Walsn
- 4 Ballades vo piano
- Sonate vo piano n° 2 en n° 3
- de Polonaises
- 4 Impromptus
- 4 Scherzi
- 2 concertos vo piano en orkest in e minor en f minor