Gebergte Sikhote-Alin

Dat artikel es geschreevn in 't Noordelik West-Vlams.

---

't Gebergte Sikhote-Alin (Russiesch : Сихотэ́-Али́нь) is e bergkeetn in de Russiesche provinsjes Primorsky Kraj en Khabarovsk Kra, dat êm uutstrekt oovre 900 kielomeetrs te nôordôostn van de Russiesche zêe-oavn Vladivostok an de Stille Oseoane. D' ogste toppn zyn Tordoki Yani mê 2 077 m boovn de zêespeegle, Ko-Berg (2 003 m) in Khabarovsk Kraj en Anik-Berg (1 933 m) in Primorsky Kraj.

Liggienge van 't Gebergte Sikhote-Alin (Russiesch : Хребет Сихотэ-Алинь).

Busschn in zuudlik Sikhote-Alin.

Êrfst in zuudlik Sikhote-Alin.

Eirdrykskunde

Aloewêl da Sikhote-Alin in e warm-gemoatigde zôone ligt, kommn dr sôortn vôorn die typiesch zyn vo de nôordlikke boreoale busschn, lik de karieboe (Rangifer tarandus) en de bruune beir van Ussuri (Ursus arctos) en die tegoare leevn mê sôortn uut de troopn, den Amoerpantre (Panthera pardus orientalis), de Siebeeriesche tygre (Panthera tigris altaica), en d' Oaziesche zwarte beir (Ursus thibetanus). Dr zyn styf winnig wolvn in de streeke, omda die nie ip kunn teegn de tygrs . Den oedste boom in de streeke is e duusd joar oede Japansche venynboom (Taxus cuspidata).

Geschiednisse

In de joarn 1910 en 1920 wierd 't Gebergte Sikhote-Alin groendig oendrzocht deur Vladimir Arsenyev (1872–1930) die zyn beleevnissn beschrêef in verschillnde boekn, mê noame Dersu Uzala (1923), da in 1975 wierd verfielmd deur Akira Kurosawa en dat 'n Oscar gewoenn êt. De grôote nateurriezêrvoatn van Sikhote-Alin en Lazo wierdn ingericht in 1935 vo d' uutzoendrlikke biejoloogiesche rykdom van de streeke te bewoarn.

Ip de 12stn februoari 1947 voend êen van grotste meetejôorn-reegns platse van de teegnwôordige geschiednisse in 't Gebergte Sikhote-Alin. De meetejôoriet oentplofte in den atmosfêer otn no beneen kwam, en 't reegnde veele tonn metoal in n' ellipsvormig gebied van roend de 1,3 km2 ippervlakte. Dr wierdn kroatrs gevormd deur de meetejôorn; de grotstn ad e deurmeetre van 26 meetrs.

In 2001, platste den UNESCO Sikhote-Alin ip de lyste van 't UNESCO-weirlderfgoed, en vermelde zyn belank vo 't "oovreleevn van bedreigde sôortn lik Chieneesche zoagbêk (Mergus squamatus), Blakiston-visuul (Bubo blakistoni) en de Siebeeriesche tygre". 't Gebied van 't weirlderfgoed besloat e totoale ippervlakte van 16 319 km2, woavan da 't kerngebied Sikhote-Alin-Zapovednik 3 985 km2 omvat. 't Kerngebied kut allêene mo bezocht wordn in 't gezelschap van de buswachtrs.

Zied ook noa

• Boreoale busschn van Okhotsk-Mantsjoerye

Eksterne koppliengn

• (en) Zhuravlev, Yu. N., ed. (2000) Стратегия сохранения биоразнообразия Сихотэ-Алиня = A Biodiversity Conservation Strategy for the Sikhote-Alin' Vladivostok: Russian Academy of Sciences, Far Eastern Branch
• (en) Sikhote-Alin (UNESCO)
• (en) Central Sikhote-Alin.
• (en) Sikhote-Alin.
• (en) Central Sikhote-Alin, Russian Federation (Encyclopedia of Earth).

Ofbeeldiengn die ier by passn ku je vien in de categorie Sikhote-Alin van Wikimedia Commons.

Verwyziengn

<references>