Ionische Zêe

D'Ionische Zêe (Italioans: Mar Ionico ofte Mar Ionio; Grieks: Ιόνιο Πέλαγος, Ionio Pelagos; Albanees: Deti Jon, letterlyk vertoald "Ouze Zêe") es 'n zêe in Zuud-Europa, geleegn o de zuudôostkantn van't Itoalisch schiereyland, o d'ôostkantn van Sicilië, o 't westn van Grieknland en 't zuudwestn van Alboanië. Ip't Italioansche vasteland liggn de regioots Calabrië, Basilicata en Apulië an d'Ionische Zêe. Ip zyn diepst es de zêe 4206 mèiters diepe.

Liggienge van d'Ionische Zêe

D'Ionische Zêe makt dêel uut van de Middellandsche Zêe. De Stroate van Messina makt in't nôordwestn de verbindienge mè d'n Tyrreenschn Zêe, die ôok by de Middellandsche Zêe ort. In't nôordn lôopt d'Ionische Zêe oover in d'Adriatische Zêe via de Stroate van Otranto. O de zuudôostkantn lôopt d'Ionische zêe by de Peloponnesos oover in d'Egeïsche Zêe.

Den Golf van Tarente en den Golf van Patras moakn dêel uut van d'Ionische Zêe. In d'Ionische Zêe liggn an den ôostkant d'Ionische eylandn (die by Grieknland ôorn) woavan de grotste Korfoe, Lefkas, Ithaka, Kefalonia en Zakynthos zyn. Grôote steed'n die an d'Ionische Zêe liggn zyn ounder and're Syracuse, Catania, Tarente (an den gelyknoamign golf), Crotone, Korfoe en Patras (an den gelyknoamign golf).

De noame van de zêe èit nietn van doen mè de landstreke Ionië, wa in't westn van Klêen-Azië ligt en in't hil nie an d'Ionische mor an den Egeïschn Zêe ligt. 't Es genoemd noa Io, e nimfe uut de Griekse mythologie die veranderd wierd in e koebêeste en deurda ze gestookn wos deur e daaze in die zêe sproung.

Ofbeeldiengn die ier by passn ku je vien in de categorie Ionian Sea van Wikimedia Commons.