Jantje by zyn klokkn vanboovn ip 't belfort van Sluus
Bier met de noame Jantje van Sluus

Jantje van Sluus is de noame van e gekleurd beeldje in hout uut 1424, da gemakt is deur Jacob van Huse en dat in Sluus in 't belfort stoat en ip gezette tydn de klokke sloat.

Over da beeldje doen verschillige vertelsels de rounde. In 1604 wierd Sluus binst de Tachtigjoarign Oorloge veroverd deur Maurits van Oranje, moa de Spanjoardn wildegen de stad were in handn krygn. In 1606 was 't zoverre. De Spanjoardn bepeisdegen e truc, woaby da z'e leger ipsteldegen by d'ôostpôorte, binst dat er an de zuudkant een ofleidiengsmaneuver moste gebeurn. Ip e bepoald tydstip, by 't sloan van de klokke, giengn ze ton attaqueern.

Moa de klokke sloeg nie, want de klokkeluder, Jantje van Sluus, was dien dag juste noa de kerremesse gewist en j'had serieus in den drank gezeetn. Doarom liet 'n zyn zeune en zyn neve de klokke ipwiendn, moa z'haddn da te styf gedoan, woadeure da 't mechanisme nie werktege en de klokke nie sloeg. De Spanjoardn peisdegen an verroad en ze dostn de stad nie bezettn.

Jantje van Sluus is sedertdien den held van Sluus.

't Belfort is binst de Twidde Weireldoorloge in 1944 vernield, moa 't beeldje blêef gespoard. Loater is 't belfort gerestaureerd en is 't beeldje were ip zyn plekke gezet. 't Sloat nu were ieder quart ip de klokke.

Jantje van Sluus is nu ook verêeuwigd in e bier, da gebrouwn wordt in brouwery Bios in Ertvelde.