Jules Auguste Lemire
Jules Auguste Lemire, (Oud-Berkyn, 23 april 1853 - Hoazebroeke, 7 moarte 1928) was e Fransche katholieke paster en politieker, die vele van zyn redevoeriengn hield in 't Frans-Vlams.
Jounge joarn bewerkn
Lemire weunde ip de boerderye van zyn ouders in Oud-Berkyn. Je gounk noa schole in 't college Saint-François d'Assise in Hoazebroeke en je krêeg doa lesse van de politiek g'engageerde paster Jacques Dehaene. J'hoalde zyn baccalauréat in 1872. In 1878 ist 'n paster gewyd en benoemd in 't college van Hoazebroeke, woa dat 'n Vlams lêerdege klappn. Je gaf doa lesse in latyn, grieks en filosofie.
Politiek bewerkn
In de 19e êeuwe was 't katholicisme in Frankryk nog styf traditionalistisch en vele droomdegen nog van een herstel van de monarchie. De christn-democratie krêeg 't styf moeilik deur de antiklerikoale politiek. Vanof 1883 groeidege by Lemire d'overtugienge dat de kerke heur most anpassn an de moderne moatschappye. J'anveirdege de Republiek en de gelaïciseerde moatschappye die vôortkwam uut de Revoluusje. Je was vor e betere verstandhoudienge tusschn kerke en stoat.
Je kwam ook ip vo d'oarme bevolkienge en vo de Vlamsche volkstoale in Frans-Vloandern. Je was e fervente verdediger van de klêne landeigndommn. Je zetteg' hem in vo de beperkienge van kienderarbeid, verminderienge van de werkeurn vo vrouwn, invoerienge van kiendergeld en je was teegn de dôodstraffe.
In 1893 wast 'n kandidoat vo de Fransche parlementsverkieziengn. Je kwam ip by de Christn-Socialistn en je gerakte verkoozn. Ook in de verkieziengsjoarn 1898, 1902, 1906 en 1910 wast 'n osan herkoozn. Je publiceerde zyn ideeën in de "Réforme sociale" en de "Révue" van Rysel en je gaf zyn eign tydschrift uut "Cri des Flandres".
't Aartsbisdom Koameryk dreigdege met e verbod vo Lemire vor hem nog langer kandidoat te stelln by de verkieziengn. E goe joar loater was de breuke tusschn de paster en zyn bisdom compleet. Lemire ha contactn mè reformistische socialistn, radicoaln en gemoatigde republikeinen. In 1914 wast 'n algelyk were verkoozn vo de zesde kè en drie moandn loater ook toet burgemêester van Hoazebroeke. Van den bisschop mocht 'n de messe nie mè leezn in 't openboar, moa die schorsienge is in 1916 ipgeheevn deur paus Benedictus XV.
Museum bewerkn
Lemire stichtte 't museum vo folklore in Hoazebroeke