Kanoal Kortryk-Bossut

Dit artikel es geschreevn in 't Kortryks, en da zou best ozô bluuvn.

Het kanoal Kortryk-Bossut es een West-Vlamske voart die de Leie verbiendt met de Skelde. Gelyk da de noame angeeft begunt et in Kortryk (Leie) en endigt et in Bossut (Skelde). Mo officiël is't achterstevwoaren: Bossut-Kortryk.

Liggienge

De voart es 15,213 km lang, een brièdte va 30-40 meiters en een diepte van 6 meiters. Het kanoal ligt ôger dan de Leie en Skelde, en et ôogteverskil moest ipgevangn weird'n deur 11 sluuzn. Der wos wok nen tunnel va 600 meiters langk ('souterrain') en een pompstation nôdig.

Geskiedenisse

De voart es gegroavn gewist tussn 1857 en 1860 deur 1.100 weirkminsn. 't Wos in 't begun bedoeld voo 't vervoeren va stêenkool vanut de Borinoze noa Kortryk. In de joaren '70 es het kanoal verbrièdt gewist om grôtere skeep'n deure te loat'n. Doardeure woarn de ièste pomp'n nie sterk genoeg mi en ein ze een nieuw pompgebuow gebouwd noast 't oud. D'er zin oak mo 6 sluzen mè (3 groate en 3 klintjes)in platse van 11 en de soutring is utgegroaven.

De voart passeert in Stoasegem, Zwevegem, Knokke, Êestert en Moen. In Kortryk komt et ut in de Leie ip een plekke woar da overtyd Crommeleires brugge wos, moar woar da nu de nieuwe Groeningebrugge stoat. Der zyn nog een antal beskermde sluuzn (die drie klintjes, nummers negen tiene en elve) te zien.

Toerisme

Vroeger kost je goe visskn ip de voart, moa omda sins kort het kanoal zelve moe instoan voo zyn zuverienge, es de kwaliteit van 't woater te slicht gekoomn voo de vis. Der zyn wok veloroutes langs de voart: de Leie-Schelderoute va 49 km lôopt hêlegans langs 't kanoal. In Bossut keun je het oude pompgebow bezoekn da in 1992 deur de gemêente Oavelgem angekocht gewist es. Ge keunt er de oude pompn goan bezoekn en informoatie vindn over de streke.

Ofbeeldiengn die ier by passn ku je vien in de categorie Canal Kortrijk-Bossuit van Wikimedia Commons.