Karel den Joungern

Karel den Joungern (ca. 772 – 4 december 811), was de twidde zeune van Karel den Grôotn. Zyn moeder was Karels twidde wettelikke vrouwe Hildegard van Vintzgau.

Mè zyn êeste vrouwe Himiltrude ha Karel den Grôotn gin wettelik huwelik. Ze was zyn concubine. Met heur had 'n e dochter Amaudru en e zeune Pepeyn. Je zetteg heur an de kant vo te kunn trouwn me de Langobardische prinsesse Desiderata. Mo dat huwelik wierd in 771 g’annuleerd.

Pepeyn met de Bulte kwam nie in anmerkienge vo d’erfipvolgienge. In 780 ounterfde Karel den Grôotn hem officieel en in 781 miekt ie zyn twi joungste zeuns keunink:

• Karloman van Italië, en zyn noame wierd veranderd in Pepeyn.
• Lodewyk den Vroomn van Aquitanië.

Round 789 begost Karel den Grôotn t’ounderhandeln met den Ingelschn keunink Offa van Mercia. Je wilde Karel den Joungern loatn trouwn met Offa’s dochter Ælfflæd. Offa was akkôord ip êen vôorwoarde, da zyn zeune Ecgfrith mocht trouwn mè Karels dochter Bertha. Karel den Grôotn hèt doarip olle contact verbrookn en d’huwelikkn zyn nie deure gegoan.

Karel den Joungern wierd den 25stn december 800 gekrôond tout keunink van de Frankn, den zelfstn dag van zyn voaders keizerskrônienge.

Karel den Grôotn overleefde zyn drie oudste zeuns en doadeure erfde zyn joungste zeune Lodewyk den Vroomn hêel 't Frankisch Ryk.