Kastêel van Tillegem
- Dit artikel es geschreevn in 't Brugs, en da zou best ozô bluuvn.
't Kastêel van Tillegem ligt in de gemêente Sinte-Machiels (Brugge). 't Omliggend bus is 'n provinsjaal domming.
't Kastêel eit 'n lange historie. Tillegem zoudt aanvanklik dêel uutgemakt ein van de fiscus Snellegem. Davan zoudt in de tiendn êeuwe de fiscus Wynebrugge, 't loatere Sinte-Machiels, em afgesplitst eine. Andere bronnn zeggn dat 't al in de 9e êeuwe, oender Boudewijn I "met de Ijzeren Arm" afgeschêen was.
't Is al gekend da Tillegem by 't begun van de dertiendn êeuwe dêel uutmakte van de bezittiengn van 't uus van Voormezele. D'oedstn gekendn êre van Tillegem was Doanevest, 'n telg uut 't oadelik uus van Voormezele. Den êre van Tillegem ad de rechterlikke, administratieve en fiskoale macht over zyn gebied.
In 1285 verkocht Jan van Tillegem d'êerlijkheid an Jan Hubrecht, één van de mêest welgestelde poorters en burgemêester van Brugge. Y was 'n anhanger van de Franse keunink. De Franse nederloage by de Guldnspoornslag van 1302 zorgde vo 't beslag up al 't bezit van de Lelioars. Up die maniere kwam Tillegem in 't bezit van de Brugse burgemêester Gillis van Aartrijke.
Daarachter is 't kastêel deur erfenisse en verkoop vele van eigenoare veranderd. 'n Andern êre van Tillegem, Joseph Adrien le Bailly was van 1730 toet 1754 burgemeester van 't Brugse Vrye. Zoender al te veel miserie deurstond de familie 't Franse bewind. Ze verloorn wel under heerlike rechtn moa bleevn toch eigenoare.
Deur den trouw van Marie-Thérèse le Bailly ging 't over noa de familie Koenig.
Deur 'n verkavelinge kwam 't kastêel in 1879 in 't bezit van Eugène de Pênaranda de Franchimont die trouwde met Clothilde de Laage de Bellefay. Omda ze gêen kinders addn, lietn ze alles an Guy en Marie-Henriette de Briey. Zy trouwde in 1916 met baron Georges Verhaegen. Under zeune, baron René Verhaegen, verkocht 't kastêel in 1980 an 't provinciebesteur van West-Vloandern.
De name Tillegem zoe kommn van " 't heem by de tille" (tille wil zeggen brugge). Tillegem is dus de versterkte platse by de brugge over de beke (de Kerkebeke).
D'êeste versterkte plekke wos nie up dezelfde plekke van 't kastêel nu. Oengeveer 200 meters in 't zuudoostn van 't kastêel is 't er e mote, 'n upg'oogde plekke me 2 cirkelvormige grachten roend, vele dichter by de Kerkebeke. Ier stoend verzekers d'outn omwallinge die de brugge bewakte. Moa vo den anleg van den A17 (E403) is 'n dêel van de mote ofgegraavn. Up 'n têekninge uut 1573 is ze duudlik zichtboar. Die ôorspronkelikke burcht zoudt 'n kapelle g'had èn die rond 1160 ingewyd wos deur Thomas Beckett.
D'er is nie geweetn wannêer dat er 'n woaterburcht in stêen gekommn is. D'oedste ofbeeldinge is gevoendn up e miniateure uut 'n 16e êeuws getydenboek. Je ziet doarup e vieroekig gebouw met oektorrn en e zwoare torre by de toegangspôorte. 't Wierd gebouwd in Dôornikse en Brabantse nateurstêen, toamelik ongeweune vo de streke.
Sedert 1980 is de provinsje dus eigenoare van 't kastêel. Nu doet et dienst vo Streekhuis van de provinsje. Oender andre 't Regionaal Landschap Houtland, de Welzijnsraad regio Brugge en de Bosgroep Houtland zyn d' er gevestigd.
Externe koppelinge
bewerknWebsite van 't streekuus Kastêel Tillegem
|
Ofbeeldiengn die ier by passn ku je vien in de categorie Kastêel van Tillegem van Wikimedia Commons. |