Konradyners

De Konradyners (Konradiner in 't Duuts) woarn 'n oadelgeslacht van West-Germoansche Frankn tusschn de 8e en de 11e êeuwe.

Zeegel van Konrad I.

Ze woarn genoemd achter Konrad den Oudern, den hertog van Thuriengn, en zyn zeune Konrad I de Joungern, die in 906 hertog van Frankn (of Franconië) kwam en van 911 ook keunienk van Oost-Francië, et loatere Duutsland.

Gebhard van Lahngau was den êeste gedocumenteerde vôorouder van de dynastie. Je steunde Lodewyk de Vroomn teegn Lodewyk den Duuts binst under ruuzjes.

Mo nog belangryker vo 't geslacht was de Konradynsche Oda, vrouwe van keizer Arnulf van Karinthië. Achter zyn dôod volgde zyn ênigste wettige zeune, Lodewyk et Kiend, hem ip. De nieuwe keunienk was an moeders kant dus e bloedverwant van de Konradyners en ze kwoamn doadeure êen van de machtigste families in Oost-Francië en Lotharingen. Gebhard, e broere van Konrad den Oudern, kwam hertog van Lotharingen in 903.

In 906 vochtn Konrad den Oudern en Konrad de Joungern teegn under rivoaln, de groavn van Babenberg, in de slag by Fritzlar. Ze versloegn ze en kwoamn azo boas over Franconië. Konrad den Oudern stierf in e gevecht en zyn zeune kwam hertog van Franconië in zyn plekke.

In 911 stierf Lodewyk et Kiend, de latste Karoliengsche keunienk in Oost-Francië, want Konrad I wierd verkoozn ols zyn ipvolger. J'is den ênigste Konradynsche keunienk gewist. In Lotharingen wierd ie nie verkoozn. Doa koozn ze Karel de Simpeln van West-Francië.

Hêel de periode dat ie keunienk was het ie standvastig moetn vechtn teegn de groeiende macht van d'hertoogn van de stamhertogdomn Saksn, Beiern en Zwaabn.

Je besefte da den hertog van Saksn den ênigstn was die capabel was vo 't keunienkryk tegoare t'houdn en ip zyn sterfbedde kost ie zyn broere Eberhard overhoaln vo de krône over te droagn an Hendrik de Veugeloare, den hertog van Saksn, die hem ipvolgde in Oost-Francië. Eberhard volgdeg' hem ip ols hertog van Franconië.

Under stamboom

Gebhard, groaf van Lahngau († 879)

1. Udo van Neustrië, groaf van de Lahngouwe
   1. Konrad, hertog van Thuriengn († 906)
      1. Konrad I († 918), van 906 hertog van Frankn (of Franconië) en van 911 keunienk van Ôost-Francië, et loatere Duutsland
      2. Eberhard (ca. 885 – 939), hertog van Frankn (of Franconië) van 918
      3. Otto († achter 918), groaf in de Ruhrgau
   2. Eberhard († ca. 903), groaf in de Niederlahngau
      1. Konrad Kurzbold († 948), groaf in de Niederlahngau
      2. Gebhard († achter 947), groaf in de Ufgau
      3. Eberhard († 944), groaf in de Bonngau
      4. een dochter, trouwde me Werner, groaf in de Nahegau en vôorvoader van 't Salisch Huus
   3. Gebhard († 910), hertog van Lotharingen
      1. Herman I (†949), hertog van Zwaabn
      2. Odo († 949), groaf in de Wetterau, trouwde me Cunigunda, dochter van Herbert I, groaf van Vermandois
         1. Heribert, groaf in de Wetterau (925–992)
            1. Ermentrude (972–1015), trouwde me groaf Frederik van Luxemburg
            2. Otto van Hammerstein (975–1036), groaf van Zutphen, trouwde met Ermengarde, dochter van Godfried, groaf van Verdun
   4. Rudolf I († 908), bisschop van Würzburg
2. Waldo, abt van de Ryksabdye Sankt Maximin in Trier 868/879
3. Bertulf, aartsbisschop Trier (869-883)
4. Berengar I van Neustrië († achter 879), groaf in de Hessengau
   1. Oda, vrouwe van Arnulf van Karinthië