Louis Braille
Louis Braille (Coupvray , Seine-et-Marne, 4 januoari 1809 – Parys, 6 januoari 1852) was d'n oentwerper van 't brailleschrift, e lees- èn schryfsystème vo blènde. Zèlve was-t-ie an zyn drie joar blènd gekomn deurda-t-ie per oengeluk met e noalde in zyn oge stèkte. Deur en infècsje kwam-t-ie ook blènd an zyn ander oge. In 1819 goenk Braille noa 't Nationaal Instituut vo Blènde Joengers in Parys, woar dat ie te weet'n kwam dat er in dazèlfste joar e speciaal nachtschrift oentwikkeld was deur en artillerieofficier in 't Frans leger, Charles Barbier. Doarby wierd e raster van twoalf punt'n gebruukt, woarip in reliëf codes wierd'n angebrocht die in 't doenker voelboar woarn. Verzekers is Louis Braille azo ip 't gedacht gekomn vo twèe joar loater etwadde in die genre vo blènde t' oentwikkeln.
Os Braille viftiene was, kwam-t-ie mèt en eiste plan vor e blèndeschrift èn in 1829, an zyn twyntig joar, haad ie 't heilegans oentwikkeld toet e bruukboare methode deur 't twoalfpuntsystème te vervangn deur e minder ingewikkeld zèspuntsystème.
Zyn scholemoat'n begost'n 't direct te gebruuk'n, moa 't was moar in 1854, twèe joar achter zyn dowd, da 't brailleschrift officieel èrkènd wierd. Nog assan wordt 't weireldwyd deur èn vo blènde toegepast.
