Meer van Nemi
't Meer van Nemi (Italioans: Lago di Nemi) es e toamelyk klêen vulkoanisch kroatermeer in d'Alboanse Euvels in d'Italioansche regio Lazio. 't Ligt ip apeupri 30 kilomèiters van't center van Rome, o de zuudôostkantn van't grôotere Meer van Albano. Round et meer liggn (mè de wyzers van de klokke mee) de gemêentn Nemi ('t stadje woa 't meer noa genoemd es), Genzano di Roma en Ariccia.
't Meer van Nemi eit en ippervlakte van 1,67 vierkante kilomèiters en es ip zyn diepste punt 33 mèiters diepe.
Geschiedenisse
bewerkn
Kykt noa Nemi
In tydde van de Romein'n noemdigde 't meer Nemorensis Lacus in't Latyn. 't A ôok de bynoame Speculum Dianae (wa "Speegel van Diana" wilt zeggn), wa verwyst na de serkelvorm van't meer en na't feyt dad ier in de busschn by 't meer en illigdom lag geweyd an de godinne Diana Nemorensis, wiens verêerienge surtout gekend es deur sir James George Frazer zynn'n boek The Golden Bough. Vo de reste es 't Meer van Nemi ôok gekend vo de bôotn van Caligula die ze ier in d'Oudeyd expres ad'n loatn zienkn en die ze ounder Mussolini were boovng'oald ein. De restantn van die scheepn (die wel vo 't grotste stik verbrand zyn deur nen brand bist d'n Twiddn Weireldoorloge) kun je nu nog bezichtign in't Museo delle Navi Romane in Nemi.