Itoalië Nemi

Nemi binn'n de metropolitoane stad Rome
Regio Lazio
Provinsje Rome Ôofdstee
(metropolitoane stad)
Coördinoatn 41°43′NB 12°43′OL
Ippervlak 7,33 km²
Inweuners

Bevolkiengsdichtheid

1908 (2017)
260 inw./km²
Postcode 00074
Website Officieeln site van Nemi


Nemi es en Italioansche gemêente binn'n de metropolitoane stad Rome Ôofdstee in de regio Lazio. 't Ligt o de zuudôostkantn van Rome zelve, ip apeupri 32 kilomèiters van't center van Rome, temidd'n d'Alboanse Euvels. Nemi ligt ip 'n verôog o d'ôostkantn van't veel lêeger geleegn Meer van Nemi.

Zicht ip Nemi

Liggienge bewerkn

Nemi grenst an de gemêentn Ariccia, Genzano di Roma, Rocca di Papa en Velletri. De gemêente èit vuuf wykn/gehuchtn (frazioni): Parco dei Lecci, Valle delle Colombe, Valle Petrucola, Vigna Grande en Ville di Nemi.

Cultusplekke bewerkn

De noame van de plekke komt van't Latynsche nemus, wa "illig bus" wilt zeggn. In den Klassiekn Oudeyd wos ier gin stad of dorp, mo wos't bus by 't Meer van Nemi wel de plekke van êen van de bekenste oud-Romeynsche cultussn en verêeriengsplekken: den tempel van Diana Nemorensis. Bekend wos ôok de Rex Nemorensis (Latyn vo "de keunienk van Nemi" ofte "de keunienk van't bus"), d'n illign keunienk die ôok de priester van de godinne Diana wos. 't Verhoal van de Rex Nemorensis es surtout gekend deur "The Golden Bough", 't boek van den Schotsn antroopolôog sir James George Frazer (1854-1941), wa gekend es lyk êen van d'êeste belangryke werkn ip't vlak van mythografie en religiegeschiedennise van d'Oudeyd.

De bôotn van Caligula bewerkn

 
De scheeprompn in't Museo delle Navi Romane in Nemi

Misschiens ad 'n twuk te moakn me de cultus van Diana Nemorensis, da de Romeynschn keyzer Caligula ier verschilligte vrêe grôote en diere sjieke bôotn liet bouwn vo te voarn ip't meer. Êen van die scheepn diende lyk 'n illigdom bedoeld vo religieuze ceremonies ip t'oudn', oftewel vo Diana Nemorensis, oftewel vo de mysteriecultus van d'Egyptische godinne Isis. En and're wos geweune vo de leute vo der toertjes mee te doene, uutgerust me verschilligte vertrekkn. Achter d'oumwerpienge van Caligula wierd'n de bôotn expres tout zienkn gebrocht.

De scheepn wierd'n erountdekt bist de renaissance, ton da architect Leon Battista Alberti probeerde van ze noa boovn t'oaln mè kôord'n. Da gienk wel nie, mè da 't out van de bôotn wos ol doanig verrot en de kôordn giengn derdeure sny'n.

De bôotn wierd'n uutendelyk gered tusschn 1929 en 1932 in ipdracht van Benito Mussolini, van wie gekend wos da't 'n geirn gebouwn en and're zoaken uut de Romeynsche oudeyd ipkallefoaterde vo 't fascistische Itoalië extra prestiezje te geevn. De bôotn wierdn boovng'oald deur 't woater in't meer te loatn zakkn deur 't gedêeltelyk te draineern deur d'oundergroundse kanoaln van de Romein'n te gebruukn en ze wierd'n in e specioal dorvo gemakt museum gestookn. Mo de scheepn wierd'n ofgebrand ip 31 meie 1944; Der es nu nog olsan diskuusje of datta per aksident wos deur mienschn die ulder toevlucht zochtn in't museum of da 't expres wierd gedoan deur de Duutschers ton da z'ulder trugtrokkn uut Midd'n-Itoalië. D'ooverbluuv'nde restn van d'ipgroaviengn in en round Nemi liggn nu tentôongesteld in't Museo Nazionale Romano in't Palazzo Massimo in Rome, tegoare me replica's van d'ôorsprounkelyke scheepn. D'originele scheeprompn zyn wel bewoard gebleevn en zyn nu nog olsan te bezichtign in't Museo delle Navi Romane in Nemi.

 
De freezn van Nemi

Freezn bewerkn

Nemi es ôok gekend vo zyn wilde freezn, die klêender en zoeter zyn of commerciël gekwêekte freezn. Ze groei'n langs de flankn van de vulkoanische kroater, wa ezo vo e microklimoat zorgt deurda de warmte van de zunne der lager bluuft angn en de kroater zorgt vo beschuttienge teegn de wind. In Nemi wordt er ton ôok joarlyks e freezefestival g'oud'n.

Beziensweirdigeedn bewerkn

 
De restn van den tempel van Diana
  • De Santa Maria del Pozzo-kerke
  • 't Illigdom van't Illig Kruus (Santuario del Santissimo Crocifisso)
  • 't Palazzo Ruspoli
  • De restn van den tempel van Diana (mè stikkn van de twêede êeuwe v.C. tout de derde êeuwe n.C.)
  • De Romeynsche woaterwerkn by't Meer van Nemi
  • De Villa di Cesare, nen Romeynschn villa woa ze van zeydn dat'n van Julius Caesar wos, mo die eigntlyk gebouwd es in de derde of vierde êeuwe n.C.
  • 't Museum van de bôotn van Caligula (Museo delle Navi Romane)