Pepinidn

De Pepinidn of Pippinidn woarn e familie van Frankische edeln die diendn ols Hofmeier ounder de Merovingische keuniengn, êest in Austrasië en loater ook in Neustrië en Bourgondië. De functie van Hofmeier kwam erfelik by de Pepinidn.

’t Frankisch Ryk ounder de Pepinidn met Austrasië, Neustrië en Bourgondië in ‘t blow

Pepeyn I

‘t Geslacht is gesticht deur Pepeyn I van Landn, in ’t begun van de 7ste êeuwe. De familie haad uutgestrekte bezittiengn in Austrasië, ’t nôordôostelik Frankisch dêelryk. De rykdom van ’t geslacht haad er vôorn gezorgd dan z’hunder haan kunn ipwerkn tout Hofmeiers, die mochtn zorgn vo de keunienklikke bezittiengn.

Begga, de dochter van Pepeyn van Landn, trouwde met Ansegisel, de zeune van Arnulf, de bisschop van Metz. Hunder zeune was Pepeyn II van Herstal. Pepeyn van Herstal veroverde Neustrië in de Slag by Tertry in 687 en ôok Bourgondië.

Pepeyn II

Pepeyn II van Herstal was de voader van Karel Martel. Karel Martel was e bastoardzeune en doarom nie erkend deur d’andere Pepinidn, moa je was toch de feitelikke leider. Je volgde zyn voader ip achter e gevecht met de wettelikke erfgenoamn.

Pepeyn III

In 751 zette zyn zeune, Pepeyn III de Kortn, de latste Merovingische keunienk Childerik III of. Ze schoorn zyn hoar of en ze slootn hem ip in e klôoster. De Merovingische dynastie wierd vervangn deur de Karoliengers, genoemd achter Karel Martel. Pepeyn de Kortn was den êeste keunienk van de nieuwn dynastie en d’r kwam ‘n ende an den titel van Hofmeier.

De Hofmeiers

• Pepeyn I van Landen (Austrasië: 623-629 en 639-640 †656)
• Grimoald I, zeune van Pepeyn I, broere van Begga, nounkel van Pepeyn van Herstal (Austrasië: 643-656 †662)
• Pepin II van Herstal, zeune van Begga, klêenzeune van Pepeyn I (Austrasië: 680-714, Neustrië en Bourgondië: 687-695)
• Drogo van Champagne, zeune van Pepeyn van Herstal, halfbroere van Karel Martel (Bourgondië: 695-708)
• Grimoald II, broere van Drogo (Neustrië: 695-714, Bourgondië: 708-714)
• Theudoald, ounwettige zeune van Grimoald II (Austrasië, Neustrië, en Bourgondië: 714-716)
• Karel Martel (Austrasië: 715-741, Neustrië en Bourgondië: 718-741)
• Karloman, zeune van Karel Martel (Austrasië: 741-747 †754 of 755)
• Pepeyn III de Kortn, zeune van Karel Martel (Neustrië en Bourgondië: 741-751, Austrasië: 747-751)