Picanol

Dit artikel es geschreevn in 't Ypers, en da zou best ozô bluuvn.

---

Picanol Group is en internaschonoaln Belgischn groep die especialiseerd is in de fabricoasje e verkoop va weefgetouwn. 'n Oofdzetel is in Yper, moa z'en ouk belangn in anger land'n: Olland, Duutsland, Vrankryk, Italie, Turkeye, Roemeenje, Brazilje, China, Indoneesje, Mexico, en Amerika.

't Oude logo van Picanol, an 'n entree van de fabrikke

De geschiedenisse in 't kort

De geschiedenisse van Picanol es straf nauwe verweevn met d'istorie van de Familie Steverlynck die ol in Vichte en Argentinië styf actief wa in den textiel.

De vôorloper van Picanol ontstond in 1928 by de firma "Vansteenkiste" in Yper die maschienn voe de vlasverwerkienge makte. Der zat wel vele geld in van de Steverlyncks.

Z'an ouk goeie contactn met e poar Spoansche weefspecialisten die wegelôpen an voe 'n Spoanschn burgerôorloge.

't Begun

• In 1936 richt Charles Steverlynck e bedryf up: Weefautomaten Picanol nv. Jaimé Picañol, ne Spoanschn enzjienieur, ad êen van d'êeste weefgetouwn emakt me 'n automoatischn schietspoele, 'n Omnium die rap vele succes adde. Vier joarn loater kunn ze êén Omnium doags moakn.
• In 1951 verovert Picanol 'n textielweireld mèd e machine woavan dazze d'r 160.000 kunn verkoop'n.

Professionaliserieng

• In 1966 goa 't bedryf no de Beurze. In 1970 volg'n Bernard Steverlynck (vôorzitter van de Raad van Bestuur) e ze broere Emmanuel (CEO) nunder voader Charles up.
• Nu en toen zorgt Picanol voen e weireldprimeur: in 1975 bevôorbeeld moakn ze d'êeste weefmachiene zoender schietspoele: 't goarn is en bitje natemakt en met e luchtstroom wegeschootn.
• In 1987 komt Patrick Steverlynck (zeune van Emmanuel) CEO en Vôorzitter.
• 't Ende joarn '80, begun joarn '90 komt Picanol grodder en grodder: deur fabriekn te begunn in aar landn (lik in China) of deur aar bedryvn over te pakkn.
• In 2002 veruust Picanol na nieuwe gebouwn da ze 'Ypres Textile Center' noemn, de vôormoalige gebouwn van 't failliete Lernout en Hauspie

Miender goe joarn

't Is overol crisis, en Picanol voel et ouk. Nunder cyfers zyn nog goed, moa dat is voen e grôot stik deur 't succes in China. Nu en toene moetn z'ier te lande menschen ofdankn.

Ondertusschn zyn z'ouk an de derde generoasche van de famille, de generoasche in familiebedryvn woa da 't dikkers omploft. De familieconflictn tusschn de mêer actieve andêelouders en de passievre die ollêne moa kykn oe da nunder kluut'n upbrieng'n vergrôot'n moa en 't zyn van langstom mêer "professionele" besteurders van buutn de famille ingeschoakeld.

Setoe in 2004 kwaamn ze negatief in 't nieuws. Juuste achter dan der 21 menschen nunder werk kwyt woarn, kwaam et uut da Jan Coene, gedelegeerd besteurder, up drie joar tyd 22 meljoen euro in ze beuzn estookn at, up e maniere die ni ol te zuver e wos. Z'en nem toene zêre buutn gewupt, mor ondertusschn a Patrick Steverlynck, die ter wel mêer van wiste, oek nie vele goe punten mir over.

Fuuzje

In 2015 zeid'n ze da ze giengn tope doen met Tessenderlo. De noame van de nieuwn group: Picanol Tessenderlo Group. De group zoudt een omzet droain van 2 miljard euro en d'r zoudt 7.000 man werk'n.

Externe koppelienge

• Officieeln website