Piramide

Dat artikel es geschreevn in 't Noordelik West-Vlams.

---

E piramide (van 't Grieks: πυραμίς pyramís) is e bouwwerk woarvan dan de buytnste ippervlakken driehoekig zyn en vanboovn t'hopekommen in e punt of ofgeknotten top.

Piramide van Chefren, Egypte

Piramides wierdn deur vele oude beschoavingn gebouwd met e religieuze of ceremoniële bedoelinge, lik ols grafmonument of tempelberg. 't Vôordêel van 't bouwn in piramidevorm is da 't e styf stabiele bouwvorm is woardeure dan styf grôte en hoge bouwwerkn in stêen kostn gebouwd wordn.

Beschoavingn in vele dêeln van de weireld hèn piramides gebouwd. De grotste piramide qua volume is de Meso-Amerikoansche Grôte Piramide van Cholula, in de Mexicoansche stoat Puebla. Duyzende joarn lank woarn de grotste bouwwerkn ip eirde piramides, êerst de Rôo Piramide in de Necropolis van Dashur en ton de Grôte Piramide van Gizeh, alle twêe in Egypte.

• 
  De Rôo Piramide van Dashur, Egypte
• 
  De piramides van Gizeh, Egypte
• 
  Piramide van Djoser, trappiramide in Saqqara, Egypte
• 
  De Piramide van Cestius, Rome

Landn en regio's mè piramides

Centroal-Amerika

Enigte Centroal-Amerikoanse beschoavingn bouwdn piramidevormige bouwwerkn. Ze woarn geloagd en han dikwyls e tempel boovn ip de piramide. De piramide met de grotstn inhoud is dendeen van Cholula, Mexico.

China

De Chineesche piramides zyn piramidevormige bouwwerkn, woarvan dan de mêeste oude mausoleums en grafheuvels zyn, gebouwd vo de restn van vroegere keizers van China en hunder familie te bewoarn.

Egypte

De piramides uyt 't oude Egypte zyn de populairste. Alhoewel dat er nog nôois e mummie in e piramide gevoendn is, peizn oenderzoekers dan ze gebruykt wierdn ols groavn vo farao's.

Indië

Binst de Chola-dynastie wierdn in 't zuydn van Indië vele hindoetempels gebouwd met êen of mêer piramidevormige pôortgebouwn (gopurams). E belangryk vôorbeeld is de Brihadisvaratempel.

Itoalië

In Rome stoat de Piramide van Cestius, gebouwd in 12 v.Chr. 't Is e graftombe vor e ryke Romein, die achter d' annexoasje van Egypte deur Rome in 31 v.Chr. g'obsedeerd was gerakt deur d' Egyptische cultuur.

Mesopotamië

De Mesopotamiërs bouwdn piramides met e serie loagn, ziggurats genoamd. Ze wierden in oude tydn mè felle kleurn beschilderd. Van de Torre van Babel wordt gezeid da 't e ziggurat was.

Spanje

Ip 't Spoans eiland Tenerife stoan zes trappiramides, de piramides van Güímar.

Vrankryk

In Vrankryk zyn der verschillige piramides, lik de Piramide van de Keltn in Bretagne en de Falicon-piramide by Nice.

• 
  Grôte Piramide van Cholula, Mexico
• 
  Piramide van Kukulcan (El Castillo) in Yucatán, Mexico
• 
  Brihadisvaratempel, Indië
• 
  Choghazanbil Ziggurat, Iran

Ofbeeldiengn die ier by passn ku je vien in de categorie Pyramids van Wikimedia Commons.