Radio Atlantis was een Vlams piroatenradiostationg dat tussn 1973 en 1974 uutgezondn het, en dat deur de Vlamsen miljonair Adriaan Van Landschoot upgezet was. België aad een anti-piroatenwetgevienge sedert 1962, mor omdat Olland zô 'n wettn nie aad belette d' er em nietend van nor een Vlams publiek uut te zendn vanuut zêe vanof den Ollandsen kust.

In 1973 aad Van Landschoot e driemoands contract mè Radio Caroline angegoan vo vorupgenoomn programs uut te zendn vanup under bôot, de Mi Amigo, die teegn Scheveningen laag. De programs woarn in een studio in Ôostburg upgepakt, en gedeurende den dag uutgezoundn. Da liet ton den avend- en nachtprograms vo Radio Caroline zyn eign Iengelstoalige programs. Dat arrangement kwaam Radio Caroline goed uut, omdat 't under een gegarandeerd inkommn gaaf zounder veel moeite.

Under "theme tune" was Atlantis van de Shadows, moa vo de Vlamse uutzendiengn gebruuktn ze een coverversie van de Spoetniks. De muziekkeuze was mêestol singles, mè d' ertussnin leutige commentoar, Amerikoanse jingles en soms vrêe amateuristische rèclames.

In oktober 1973 is den antennemast van de Mi Amigo omverre gevolln gedeurende een storm. Een tydelike vervangingsmast aa nie zô 'n grôte uutzendstroale, en ton è Radio Atlantis beslootn 't contract up te zeggn. In plekke doavan è Van Landschoot een klêen radioschip van Radio Condor gekocht, en em ommegedoopt toe MS Jeanine. Deur probleemn mè den zender is den bôot nor een plekke an den Ollandsen kust 12 km van Knokke gesleept, en doar èn ze were beginn'n uutzendn round Kestdag 1973.

In juli 1974 bedreigde 't Belgisch gerecht d' adverteerders van Radio Atlantis mè vervolgienge ounder de wet van 1962. Omdat je 't kost bekostign è Van Landschoot vor een ende de kostn uut zyn eign zak betoald, moa 't ende was toch in zicht. D' Ollandse regerienge aad uutendelik een antipiroatnwet uutgevoardigd, die van den êestn september zou van kracht wordn. De Vlamse dienst sloot up den 25sten augustus, en den internationoalen dienst up den 31sten.

Den volgenden dag èt een sleepbôot den MS Jeanine noa Vlissiengn gesleept. Van Landschoot èt een boete van 1.500.000 frang gekreegn en was bedreigd mè vuuf joar in 't gevang. Achter een beroep an keuning Boudewyn is de boete gehalveerd en de gevangenisstraffe upgezeid.

Externe koppelienge bewerkn