Raversyde (provincioal domein)

Dit artikel es geschreevn in 't Ostends, en da zou best ozô bluuvn.

Het provincioal doming Raversyde is e doming geleegn in 't gehucht Raversyde in de duunn neffest Mariakerke, dèèlgemèènte van Ostende. 't Is in 1988 opgestart en wor nog alle joarn uutgebouwd.

Geschiedenisse

Raversyde es geleegn ip 't voormoalige Keunienklik Doming va Leopold II, die 't stik duunn gekocht et in 1902. In 1904 et 'n der een oetn gebouw op loatn bouwen, de zogenoamde Noorse Chalet. De Duutschers en da gebouw ofgebrookn in den Èèste Wereldorloge, omdat ze der een kustversterkienge wilde uutbouwn. In den Twidde Wêreldorloge woarn de Duutschers doa were, en schakelden ze 't doming in, in den Atlantikwall. Achter de keuniengskwestje is prins Karel der gon weunn toet in 1981, toet dat 'n 't verkocht et an de Belgische stoat. Sederton is't doming ersteld in zyn vroegere glorie; in 2000 is de archeologische site Walraversyde geoopnd.

Bezienswoardigeedn

Olles da me Raversyde te moakn et, e ze pleksje gekreegn in 't doming:

Openluchtmuseum Atlantikwall: 60 construcsjes ut de Twidde Wêreldorloge, verboenn me twi kilometers gangn (ook e klèèn dèèl ut den Èèste Wêreldorloge).
Memoriaal Prins Karel, med et Paviljoen van de Prins, een typisch vissersuuzetje.
Archeologische site Walraversyde: e voorstellienge van een Middelèèuws visschersdorp.