Reg Presley

Reg Presley, echte noame Reginald Maurice Ball, (Andover, Hampshire, 12 juni 1941 - zelfste plekke 4 februoari 2013) was een Iengelsche zanger en liedjesschryver. J' is surtout bekend gerakt als leadzanger van de rockgroep "The Troggs", die in de joarn tjestig e poar hits scoordn lik "Wild Thing", "With a Girl Like You" en "I Can't Control Myself".

The Troggs in 1971

Zyn bekendste composiesje is "Love Is All Around", da vele gecoverd gewist is, oender andere deur de Schotsche pop-rockgroep "Wet Wet Wet" in de joarn '90 vo de film "Four weddings and a funeral".

In 1999 kreêg Presley interesse vo paranormale verschynsels, surtout vo groancirkels. J' et er zelfs e boek over geschreevn "Wild Things They Don't Tell Us", da gepubliceerd is in 2002.

De 24ste januoari 2012 ist ie gestopt met iptreedn omdat er loengkanker by hem was vastegesteld. E joar loater ist ie gestorvn an zyn 71 joar.