Remi Ghesquiere

Alphonse Remi Aloïse Ghesquiere (Gilwe, 9 december 1866 - Brugge, 10 ogustus 1964) wos nen West-Vlamschn organist en componist.

Ghesquiere es geboorn in 1866 op d'oeve "Ter Peperstraete" in 't gehucht Ter And in Gelwe. Ne wos de zeune van boer Victor Josephus Ghesquiere en Sophia Octavia Cardoen. Achter êenigte joarn middelboar oenderwys in Mjinde, hoaldeg' ie in 1884 zynn'n diplom van oenderwyzer en koster-organist an de normoalschole in Torout, zyne lêeroare wos Alfons Mervillie, ne vrêe liefebber van de muuzik van Bach. Ne wierd organist van de Kortrykse Onze-Lieve-Vrouwekerke woar da Guido Gezelle kapeloan wos. Gezelle lêerde 'nem de Vlamsche folklore kenn'n en op zyn anroad'n verzoamelde Ghesquiere ollerande oude Vlamsche volksliedjes, die wierd'n uutgegeevn in 1905 en bekrôond deur de Keunienklyke Vlamsche Academie vo Toal- en Letterkunde (300 Spelen met zang verzameld in Vlaamsch Belgenland en voornamelijk in West-Vlaanderen). In Kortrik wostie de medestichter van de Groeninghegilde.

Buutn orgelmuuzik en pianowerk makte ie ôok nog vocoale muuzik in't thema van de (katholikke) Vlamsche Beweegienge en die mêestol e pedagogische, strydende of religieuze dimensje ad'n: liturgische werkn, gêestelyke liedern (ip tekste van Gezelle, lyk O Maria die daar staat), koor'n, strydliedern (vb. 't populaire De trommel slaat), gezoungen kindertonêelkes, cantates en zangspêeln. Ne publiceerde ôok e vierdêelige pianomethode. Zyn Vlaamse kinderspelen wierd'n bekrôond deur de Keunienklyke Vlamsche Academie.