Roger Wittevrongel
Roger Wittevrongel (Blanknberge, 23 april 1933) is e West-Vlamsche kunstschilder, têkenoare en etser. Wittevrongels werk wordt by 't hyperrealisme gerekend, één van de vele vormen van realisme die surtout in Amerika ipkwam in de joarn 70.
Leven en werk bewerkn
Wittevrongel krêeg zyn ipleidienge in Gent. Je combineerdege de Keuninklike Academie vo Schône Kunstn (1953-1956) mè studies vo lêroare plastische ipvoedienge in de Ryksnormoalschole (1954-1956) ounder leidienge van Octave Landuyt.
Van 1956 tout 1971 was 'n lêroare plastische ipvoedienge in de Ryksmiddelboare schole in Gent en doarachter tout 1997 docent etsn, têkenen en lithografie an de Keuninklike Academie vo Schône Kunstn in Gent, woa dat 'n de titel Eredocent krêeg.
Roger Wittevrongel begost als kunstenoare in 1954. Je was g'influenceerd deur zyn lêroare Octave Landuyt, moar abstracter mè werk round thema's van vernielienge, verwoestienge en bêestekoppn.
Wittevrongel begost hyperrealistisch te têkenen, te etsn en te schildern round 1969, nie lik d'Amerikoanen, moa zyn ounderwerpn woaren mêer volgens d' Europeesche traditie, lik vrouwelik nakt en atelierinterieurs ofgewisseld mè garagepôortn, meurn, balkn, kôordn, zeils en beddn. Ipvallend an Wittevrongels thema's is dat 'n ze alsan frontaal vôrenstelt. Z'n werk is sober van kleur, lineair en mè zin vo symmetrie ipgebouwd.
Roger Wittevrongel exposeert sedert 1954 in België en in 't buutnland o.a. in Holland, Frankryk, Iengeland, Itoalië, Zwitserland, Duutsland, Zweedn, Marokko, Tunesië, Zuud-Afrika, Brazilië, Japan, Amerika, Canada en Taiwan.
Pryzn bewerkn
- Vermeldienge Prys Jounge Belgische Schilderkunst in 1958, 1960, 1963
- Prys Provincie West-Vloandern in 1960
- Prys van de Kritiek in 1979 en 1981
- Prys E. Van Marcke in 1981
- Stoatsprys in 1984.
Vo 't moment weunt Roger Wittevrongel in Bachte-Maria-Leerne (provincie Ôost-Vloandern) an de Leie, by Gent.