Sibylle van Anjou

Sibylle van Anjou (ook Sybille of Sybilla) (ca. 1112 - Bethanië (Jeruzalem), 1165) was e dochter van groaf Fulco V van Anjou, die ook keunienk van Jeruzalem was, en van Ermengarde van Maine. Ze was e zuster van Godfried V van Anjou, die trouwde me de dochter van keunienk Hendrik I van Iengeland en zyn bynoame gaf an 't Huus Plantagenet.

In 1123 trouwde ze mè Willem Clito, die van 1127 tout 1128 groaf van Vloandern was, en je krêeg Maine mee. ’t Was e zeune van hertog Robert Curthose van Normandië. Mor under huwelik wierd al in 1124 g’annuleerd ip ground van bloedverwantschap deur paus Honorius II, in ipdracht van Willems nounkel Hendrik I van Iengeland. Heur voader Fulco verzetteg hem der teegn en je gaf nie toe, tout da Honorius hem excommuniceerde en ’n interdict (straffe van de katholieke kerke) over Anjou platste. Fulco dêed ofstand van Anjou en zyn zeune Godfried V kwam in zyn plekke.

Sibylle vertrok tegoare met heur voader no ‘t Hillig land. Heur moeder, Ermengarde van Maine, was in 1126 gestorvn. In 1129 trouwdeg heur voader doa mè d’erfgenoame van ’t keunienkryk Jeruzalem, Melisende van Jeruzalem, en in 1131 kwamt ie zelve keunienk van Jeruzalem.

In 1139 trouwde Sibylle mè Diederik van den Elzas, die doar ip zyn êeste reize no ’t Hillig land was, en ze kêerdn tegoare were no Vloandern.

Ot heur vint den twidde ki vertrok no ’t Hillig land mè den Twidde Kruustocht, blêef Sibylle, die in verwachtienge was, in Vloandern en ze was regente over ‘t Groafschap Vloandern. Boudewyn IV, groaf van Henegouwn wilde profiteern van de situoasje deur Vloandern an te volln, mo Sibylle sloeg hard were en liet Henegouwn plundern. Boudewyn, ip zyn toer, dêe ’t zelfste met Artesië. Den aartsbisschop van Reims most tusschn kommn en ’t vredesverdrag wierd getêeknd. O Diederik were kêerde in 1149 hèt ’n Boudewyn gewrookn.

In 1157 vertrok Diederik vo zyn derde reize no ’t Hillig land, en Sibylle gienk van deze ki mee. Under zeune Filips van den Elzas regeerde mee over 't groafschap Vloandern.

In 1159 is Diederik weregekêerd no Vloandern, mo Sibylle wilde nie mi mee. Zy wilde doa bluuvn vor in ’t klôoster van St. Lazarus te goan in Bethanië, woa da ze in 1165 gestorvn is.

Under jounges woarn:

• Filips van den Elzas, groaf van Vloandern
• Mattheüs van den Elzas, getrouwd mè gravinne Maria van Boulogne
• Margaretha van den Elzas, gravinne van Vloandern, getrouwd mè groaf Boudewyn V van Henegouwn (Boudewyn VIII van Vloandern)
• Gertrude (-1186), getrouwd mè Humbert III van Savoye
• Matilda, abdesse van Fontevraud
• Peter (-1176), bisschop van Koameryk
• Laureta, getrouwd mè groaf Hendrik I van Noamn

Ofbeeldiengn die ier by passn ku je vien in de categorie Sibylla of Anjou van Wikimedia Commons.