Soetkin Collier
Soetkin Collier (Bevern-Woas, 1 februoari 1977) is e Vlamsche zangeresse.
In 1996, os ze 19 joar oud was, stound ze ip 't hoofdpodium van 't Dranouter Folkfestival als zangeresse van Laïs, de reveloasje van Dranouter '96. Ze combineerde heur zangcarrière mè studies Germoansche Filologie (Nederlands en Zweeds) an den Universiteit van Gent.
In 1997 hè ze tegoare mè vier andere muzikantn (Tom Theuns, Wouter Vandenabeele, Wim Claeys en Jo Van Bouwel) de folkgroep 'Ambrozijn' ipgericht.
In 1999 is ze vor heur studies een half joar noa Zweedn gewist vo te studeern an den Universiteit van Stockholm. Ze volgde doa Zweedsche Toalkunde en Oud-Gotisch, moar ook zanglesse an de Folkmusikhögskolan.
In 2000 is ze ofgestudeerd als germaniste en ze zoung ton surtout tegoare mè gitarist Tom Theuns. Ze volgde ook zanglessn by Hille Bemelmans, David Davidse, Yvonne Walter-De Kock en by de mezzo-alt Eurudike De Beul.
Siddert 2002 zyn Soetkin Collier en Veronica Codesal de vaste zangeressn van de Belgische folkgroep 'Urban Trad', die in 2003 ip de twidde plekke endigde ip 't Eurovisiesongfestival mè 't liedje 'Sanomi' in e fantasietoale. Moar e poar moandn vo 't festival hen de Woaln beslist da Soetkin Collier nie mocht meedoen omda ze zogezeid e verleedn zoudt hen met extreemrechtsche sympathieën. Omdat er doa nieks van woar is, hè ze loater e proces angespann teegn den RTBF, de Belgische Radio- en tv-omroep van de Fransche Gemêenschap.
In 2007 hè ze heur êeste solo-cd 'Nocturne' uutgebrocht, woaby da ze begeleid wordt deur Tom Theuns ip gitaar en zang, Didier François ip nyckelharpa en Ben Faes ip contrabas. Live wordt Ben Faes vervangn deur Fons Vanhamel.
Vanof 2008 ziengt ze ook by de tangogroep 'La Banda Neon'.
Ze doet ook mee met de groep "Vivas Niñas", e project met Eurosongnummers.[1]