De Tyrreensche Zêe (Italioans: Mar Tirreno) es 'n zêe in Zuud-Europa, geleegn o de zuudwestkantn van't Itoalisch schiereyland, o de nôordkantn van Sicilië en o 't ôostn van Corsica en Sardinië. Ip't vasteland liggn (in reke gezet van nôord noa zuud) d'Italioansche regioots Toscoane, Lazio, Campanië en Calabrië ier ôok an. 't Eit en ippervlakte van apeupri 275.000 vierkante kilomèiters en es ip zyn diepst 3785 mèiters diepe.

Liggienge van den Tyrreenschn Zêe

De Tyrreensche Zêe makt dêel uut van de Middellandsche Zêe. De Stroate van Messina makt in't zuudôostn by Sicilië de verbindienge mè d'Ionische Zêe, die ôok by de Middellandsche Zêe ort. In't nôordn lôopt de Tyrreensche Zêe oover in de Ligurische Zêe, ol ester ier diskussje woa precis 't schêe'n tusschn de twêe ligt. In't westn ligt de Stroate van Bonifacio tusschn d'eylandn Corsica en Sardinië wordeure da je na de westkantn van de Middellandsche Zêe kunt (richtienge de Baleoarn).

In de zêe moundn der teffrente riviern uut lyk den Tiber en de Volturno. Grôote steed'n die ier an liggn zyn ounder and're Noapels, Civitavecchia, Olbia, Palermo, Vibo Valentia en Cefalù. 't Stad Rome zelve ligt nie an d'n Tyrreensche Zêe, mo wel de hoavnstad Ostia.

De noame dervan komt van Tyrrhênoi, de noame die d'oude Griekn in d'Oudeyd an d'Etruskn goavn. Mè da ze zynder nen illn ôop van ulder stadstoatn ier olangsn de zêe ad'n liggn (surtout in't uudige Toscoane), noemdigd'n de Griekn 't "de zêe van de Tyrrhênoi". De Romein'n noemdign 't ôok wel de Mare Nostrum (Latyn voe "ouze zêe"), mo die noame gebruuktn ze loater (wannêer da ze oloummêer gebied'n ad'n verooverd) vo de hille Middellandsche Zêe.

Wikimedia Commons