Wilfried Vandaele
Wilfried Vandaele (Brugge, 5 juni 1959) is e West-Vlamsche polletieker vo den N-VA. Sedert 1 januoari 2019 ist ie burgemeester van Den Hoane. Ie was Vlams parlementslid van 2009 tout 2024. Van juli tout oktober 2019 wast ie voorzitter van 't Vlams Parlement.
Wilfried Vandaele groeide ip in Vlissegem, deelgemeente van Den Hoane. Ie is ofgestudeerd as licentioat Germoansche filologie en pers- en communicoasjewetenschappen an den Universiteit Gent.
Vandaele wierd in 1979 actief in de Volksunie. Van 1 januoari 2006 tout 1 januoari 2013 wast ie schepen in Den Hoane. Intusschen wast ie in 1994 ook provinsjeroadslid en loater fracsjevoorzitter geworden vo de VU (loater N-VA) in West-Vloanderen. Ip 13 juli 2009 kwamt ie Vlams volksvertegenwoordiger en ip 9 januoari 2013 gemeenschapssenateur, in opvolginge van Bart De Wever, die burgemeester kwam van Antwerpen.
Achter de verkiezingen van 25 meie 2014 was Wilfried Vandaele were verkozen as Vlams volksvertegenwoordiger en wierd ie ook oundervoorzitter van 't Vlams Parlement. Deur de N-VA-fracsje wierd ie ook angeduyd as deelstoatsenateur. Ip 12 juli 2019 wierd Vandaele voorzitter van 't Vlams Parlement en in oktober de nieuwe fracsjevoorzitter van den N-VA in 't Vlams Parlement.
Wilfried Vandaele is getrouwd en voader van twee zeuns.