Zêelêeuwachtign

Dat artikel es geschreevn in 't Noordelik West-Vlams.

Zêelêeuwachtign

Galapagos-zêelêeuw (Zalophus wollebaeki)

Ryk:	Animalia (Bêest'n)
Stamme:	Chordata (Chordabêest'n)
Klasse:	Mammalia (Zoogbêest'n)
Clade:	Pinnipedia (Vinpôtign)
Orde:	Carnivora (Roofbêest'n)
Ounderorde:	Caniformia

Familie

Otariidae
Gray, 1825

De zêelêeuwachtign of ôorrob'n (Otariidae) zyn e familie van vinpôtige zoogbêest'n. Ze verschiln van zêehoend'n (Phocidae) deurdan ze zichtboare ôorn hèn. Z' omvat'n 15 bestoande sôort'n in zeevn geslacht'n.

Ze zyn angepast an 't leevn half in 't woater, half an land. Z' eet'n en verplatsn hunder in 't woater, moa ze rust'n en briengn hunder joengsjes ter weireld ip 't land of ip 't ys. Ze verbluuvn langst de kust'n van de Stiln Oceoan en d'n Antarctischn Oceoan.

Zêelêeuwachtign hèn 'n hoendachtige kop, scherpe, goëd oentwikkelde hoektand'n en zichtboare externe ôorschelp'n. Z' hèn bustelige snorhoarn ip hunder boovnlippe die styf beweeglik zyn en die diënn vo 't eet'n t' oenderzoek'n. De vacht bestoat uut ruwe dekhoarn. De zêebeirn hèn ook nog e dik'n oendervacht. Mannelike zêelêeuwn varieern in gewicht van 70 kg toet mêer of 1.000 kg. De ventjes weegn twè kès toet zes kès zovele of de wuvetjes.

Hunder vôorste ledemoat'n, de flippers, zyn langer en krachtiger of van zêehoend'n en ze kunn hunder achterpôot'n noa vôorn droain, woardeure dan ze gemakkelik ip 't land kunn loop'n. Hunder zwemkracht komt mêer vôort uut 't gebruuk van de zwemvliëzn of uut de bochtige bewegiengn van hêel 't lyf, wat da typisch is vo zêehoend'n en walrusn.

Zêelêeuwachtign joagn ip allerhande zêebêest'n lik visn, schoalbêest'n , schelpbêest'n en koppôtign. Sommigte sôort'n vangn ook zêeveugels.

Geslacht'n

Arctocephalus (Zudelike zêebeirn): 8 sôort'n
Callorhinus: 1 sôorte: Callorhinus ursinus (Nôordelike zêebeir)
Eumetopias: 1 sôorte: Eumetopias jubatus (Stellerzêelêeuw)
Neophoca: 1 sôorte: Neophoca cinerea (Austroalische zêelêeuw)
Otaria: 1 sôorte: Otaria flavescens (Zuud-Amerikoansche zêelêeuw)
Phocarctos: 1 sôorte: Phocarctos hookeri (Nieuw-Zêelandsche zêelêeuw)
Zalophus: 2 sôort'n zêelêeuwn

Antarctische zêebeir (Arctocephalus gazella)
Nôordelike zêebeirn (Callorhinus ursinus)
Zuud-Amerikoansche zêelêeuwn (Otaria flavescens)
Nieuw-Zêelandsche zêelêeuw (Phocarctos hookeri)

Ofbeeldiengn die ier by passn ku je vien in de categorie Otariidae van Wikimedia Commons.