Zunsverduusterienge van 11 ogustus 1999

De zunsverduusterienge van 11 ogustus 1999 is de mêest recente totoale zunsverduusterienge in West-Europa die dichte by onze streke passèrdige. De verduusterienge begost in den Atlantischn Oceoan en liep langs Cornwall in Iengeland over 't nôordn van Vrankryk, 't zuudn van België (de Gaume round Virton), 't zuudn van Duutsland, Ôostenryk, Houngareye, 't nôordn van Servië en Roemenië woardat de zunsverduusterienge zyn maximum berêektige. Van doar gieng het verder over Bulgareye, Turkeye, Iran, 't zuudn van Pakistan en 't nôordn van Indië, en endigde in de Golf van Bengalen.

Woarnemiengn

Omdat 't pad van de totoale verduusterienge over verschillende dichtbevolkte gebiedn gienk, is de zunsverduusterienge van den 11^e ogustus zounder twyfel de mêest bekeekn verduusterienge in de geschiedenisse, olhoewel dan in sommige dêeln (vôrol in West-Europa) de mensn gin chance haan deurda 't in sommige plekkn te bewolkt was. De moane zyn schaduwe wierd vanuut 't Mir-ruumtestationg gefilmd en live deuregezoundn noa d' eirde.

De BBC haad televisieploegn in Penzance en Falmout in Cornwall, wordan de wolkn 't zicht van de totaliteit wegnoamn, en oungelukkig genoeg ginne an 't Goonhilly Satellite Earth Station, woardan de wolkn juust up tyd uut mankoar giengn vo de totaliteit zichboar te maakn.
Êen van de beste plekkn vo de zunsverduusteienge te bekykn was in 't Kanaal, wodan d' overzetbôotn stille leegn vor een beter zicht van de totoale zunsverduusterienge te geevn.
In Soisson (Normandië) kloardn de wolkn up juuste achter dat de totaliteit verby was.
Verder van de kuste, teegn Vouzier, woarn d' omstandigheedn beter, en kloardn de wolkn up juuste vôr dat de totaliteit geburdige. Overolst in de streke krioeldig' het van de Belgn die vo den dag een zunsverduusteriengsuutstaptjie kwaamn maakn.

Pad van de verduusterienge over West-Europa

Kenmerkn

Animoasje van de verduusterienge

Specioal 2000 lei-brieftjie die 't pad van de zunsverduusterienge over Roemenië toogt.

Gebeurtenisse	Tyd (UTC)
Begin van den olgemêne verduusterienge	08:26:17
Begin van de totoale verduusterienge	09:29:55
Begin van de centroale verduusterienge	09:30:53
Maximoale verduusterienge	11:03:07
Ende van de centroale verduusterienge	12:35:33
Ende van de totoale verduusterienge	12:36:26
Ende van den olgemêne verduusterienge	13:40:08

Sôorte verduusterienge	Totoal
Gamma	0.5063
Magnitude	1.0286
Deure up 't maximum punt	142 s (2 min 22 s) up 11:03:07 UTC, in Roemenië
Maximum brêedte van de totaliteitsband	112,3 km