Boudewyn IV van Vloandern

Boudewyn IV, bygenoamd met den Board (980 - 30 meie 1035), was groaf van Vloandern van 988 tout an zyn dôod.

Je was de zeune van Arnulf II en van Rozala-Suzanna van Ivrea, de dochter van Berengar II, keunienk van Italië.

O Boudewyn IV zyn voader ipvolgde wast ’n nog minderjoarig en kwamt 'n ounder de voogdye van zyn moeder.

't Was nie goed gesteld mè 't groafschap Vloandern. Ol achter Arnulf I zyn dôod ha Boudewyn (Baldzo), den ounwettige zeune van zyn broere Adalolf, hem ounrechtmoatig mêester gemakt van ’t zudelyk stik van de Kortrykgouwe, en achter zyn dôod kwam ’t in handn van Eilbodo, de slotvoogd van Kortryk.

’t Nôordelyk stik van de gouwe was tegoare gevoegd mè ’t groafschap Gent en ’t Land van Woas, woavan da Dirk II, de groaf van West-Friesland, hem in 965 mêester ha gemakt.

Boulogne was noar Arnulf II van Boulogne gegoan en de streke van Guînes noa Deensche Vikings.

Vo zyn gezag were te winn vroeg Boudewyn steun an d’inweuners van Hoarelbeke, die ossan trouw gebleevn woarn an under groaf en doadeure gedeurig gepest wierdn deur de Kortrykzoann. On z’hoordn da Boudewyn ip weg was vo ’t gebied were ounder zyn gezag te krygn, vieln z'Hoarelbeke binn en stoakn ze ’t stadje in brande. Da was nie slim want nu krêegn ze de bevolkienge van ol d’andere omliggende dorpn teegn under en azo kost de groaf zounder veel moeite zyn gezag were herstelln.

Ounder de Capetiengers

Vrankryk round 987

Keunienk Lotharius was in 986 gestorvn en je wierd ipgevolgd deur zyn zeune Lodewyk V, die kort doarip in 987 ook stierf. Je was de latste keunienk van de Karolingische dynastie in West-Francië. Je wierd ipgevolgd deur Hugo Capet, de zeune van hertog Hugo de Grôotn. Doamee wierd de periode van de Capetiengers ingezet, de keuniengn van Vrankryk.

Achter da Boudewyn zyn moeder Rozala-Suzanna weeuwe gewordn was, arrangeerde Hugo Capet 't huwelyk met heur en zyn zeune, de loatern Robert II. Ze was 'n interessante partye omda ze Montreuil-sur-Mer en Ponthieu mee brocht, mo ze was ol mêer of viftig joar oud. Robert II trouwde teegn zyn gouste met heur en ze zyn loater geschid.

Reorganisoasje

Achter die moeilyke begunperiode van zyn regerienge krêeg Boudewyn mêer en mêer macht deur groundige hervormiengn. Round 993-994 verdêeldegt ie zyn groafschap in drie burggroafschappn, ieder round e groafelykn burcht. De burggroave krêegt de leidienge over de besteurlyke, de rechterlyke en de militaire organisoasje en was platsvervanger van de groaf. De drie burggroafschappn woarn:

• Brugge
• Doornik mè Kortryk en Sint-Omaars
• Gent mè ’t Land van Woas

Uutbreidienge van 't Groafschap

Nu dat olles intern gestabiliseerd was begost Boudewyn te zoekn vo zyn macht buutn ’t groafschap uut te breidn. Zyn vôorgangers Boudewyn II en Arnulf I han ’t groafschap zuudwoarts uutgebreid tusschn 879 en 965, mo nu wast er vele veranderd. Deur d’ountwikkelienge van de Normandische macht en deur de Fransche monarchie die ossan mo sterker kwam, kost Boudewyn nie mê verder noa ’t zuudn. Doarom giengt ie nu vo gebiedn ten ôostn van de Schelde, van ’t Duuts Hillig Rôoms Ryk. ’t Was nie gemakkelyk want keizer Otto II had ’n ende geleen, round 980, drie sterke burchtn langs de Schelde loatn bouwn en de markgroafschappn Antwerpn, Ename en Valenciennes ipgericht.

In 1006 pakteg't ie Valenciennes in, moa je kost ’t uutendelyk nie hoaln teegn de Duutsers, die gesteund woarn deur Fransche en Normandische troepn.

De 22stn oktober 1011 krêegt ’n ton toch ’t Groafschap Valenciennes en de streke van Zêeland in lêen. Da was 't begun van Ryksvloandern (de gebiedn in lêen van ’t Ryk) teegnover Krôonvloandern (de gebiedn in lêen van Vrankryk). In 1033 stak Boudewyn de Schelde over en veroverde ’t markgroafschap Ename.

Vrouwn en jounges

Êeste vrouwe: Ogiva van Luxemburg (in 1012), dochter van Frederik van Luxemburg. Z’haan twi jounges:

• Boudewyn V van Vloandern
• Ermengarde, getrouwd met Adalbert, groaf van Gent

Twidde vrouwe: Eleonora van Normandië (in 1031), dochter van hertog Richard II van Normandië en Judith van Bretagne. Z’haan twi dochters:

• Judith van Beiern, getrouwd mè Tostig Godwinsson, groaf van Northumberland, en mè Welf IV, hertog van Beiern
• dochter (noame ounbekend), getrouwd mè Reinier van Leuven, zeune van Lambert I van Leuven

Boudewyn IV stierf in 1035 en j’is begroavn in de St-Pietersabdye van Gent. Zyn zeune Boudewyn V volgdeg hem ip.