Boudewyn V van Henegouwn, bygenoamd de Stoutn (ca. 1150 – Bergn (België), 17 december 1195) was groaf van Henegouwn van 1171 tout 1195, markgroaf van Noamn van 1189 tout 1195 als Boudewyn I, en groaf van Vloandern van 1191 tout 1194 als Boudewyn VIII. Zyn ouders woarn Boudewyn IV van Henegouwn en Alix van Noamn.
Boudewyn erfde Henegouwn van zyn voader en Noamn van zyn moeder. Deur in 1169 te trouwn mè Margaretha van den Elzas, zuster en erfgenoame van de Vlamsche groaf Filips van den Elzas, die in 1191 stierf zounder jounges, kwam Boudewyn ook groaf van Vloandern.
Under jounges:
- Isabelle van Henegouwn, van 1180 tout 1190 keuniginne van Vrankryk deur heur huwelik mè Philippe Auguste
- Boudewyn IX van Vloandern, êeste keizer van Constantinopel (Latyns keizerryk)
- Yolande van Henegouwn, getrouwd mè Peter van Courtenay, keizer van Constantinopel
- Philippe I, markgroaf van Noamn
- Hendrik van Vloandern, keizer van Constantinopel
- Sibylle van Henegouwn, getrouwd mè Guichard IV, hêre van Beaujeu (Rhône)
- Eustace van Henegouwn
- Godfried van Henegouwn
Achter da zyn vrouwe Margaretha gestorvn was in 1194, dêed 'n ofstand van Vloandern vor under zeune Boudewyn, die hem in 1195 ook ipvolgde in Henegouwn. In Noamn wierd 'n ipgevolgd deur zyn joungere zeune Philippe I van Noamn. Zyn dochter Isabelle was d'êeste vrouwe van de Frãnsche keunienk Philippe Auguste.
