Boudewyn IX van Vloandern

Boudewyn IX van Vloandern (Valenciennes, juli 1171 – Bulgareye, ca. 1205) was groaf van Vloandern van 1194 tout 1205. Je was ook groaf van Henegouwn van 1195 tout 1205 als Boudewyn VI, en keizer van Constantinopel van 1204 tout 1205 als Boudewyn I.

Boudewyn IX/VI/I
1171- 1205
Zyn standbeeld in Bergn
Groaf van Vloandern
Periode1194-1205
VôorgangerBoudewyn VIII van Vloandern
IpvolgerJohanna van Constantinopel
Groaf van Henegouwn
Periode1195-1205
VôorgangerBoudewyn V van Henegouwn
IpvolgerJohanna van Constantinopel
Keizer van et Latyns Keizerryk
Periode1204-1205
Vôorganger--
IpvolgerHendrik van Vloandern
VoaderBoudewyn V van Henegouwn
MoederMargaretha van den Elzas

Je was êen van de belangrykste leiders van de vierde kruustocht, die endigde in de veroverienge van Constantinopel, hoofdstad van 't Byzantyns- of Ôost-Romeins Ryk. Ze beslistn van in de plekke van 't Grieks Ryk e nieuw Latyns Ryk ip te richtn en Boudewyn wierd doa verkoozn tout êeste keizer van 't Latyns Keizerryk van Constantinopel. De 16ste meie 1204 ist 'n gekrôond in de Hagia Sophia.

Zyn leevn bewerkn

Boudewyn IX was den oudste zeune van groaf Boudewyn V van Henegouwn en van Margaretha van den Elzas, zuster en erfgenoame van Filips van den Elzas, groaf van Vloandern.

Je trouwde in 1186 mè Maria van Champagne, dochter van Hendrik I van Champagne.

Achter da zyn moeder gestorvn was in 1194 kwamt ie groaf van Vloandern, en achter den dôod van zyn voader in 1195, ook groaf van Henegouwn. Azo woarn de twi groafschappn were verêenigd en da was al geleen van in 1071.

Robrecht de Fries versloeg ton zyn vôorganger Arnulf III, zeune van zyn broere Boudewyn VI en van Richilde van Henegouwn, in de Slag by Kassel. Robrecht de Fries kwam ton groaf van Vloandern, mo Richilde en heur andere zeune Boudewyn hieldn Henegouwn.

D'êeste joarn van Boudewyn IX zyn regerienge lagt 'n standvastig in conflict mè de Fransche keunienk. De probleemn kwoamn nog assan vôort uut et feit da zyn nounkel Filips van den Elzas in den tyd Artesië ofgestoan haad an Boudewyn zyn zuster, Isabelle van Henegouwn, o ze trouwde mè Philippe August. Boudewyn zocht steun by keizer Hendrik VI van et Hillig Rooms Ryk en den Iengelsche keunienk Richard Lêeuwenhart.

Achter da Filips van den Elzas gestorvn was en binst da Philippe August weg was mè de derde kruustocht in 1191, haad den eirtsbisschop van Reims hem mêester gemakt van Béthune en andere steedn van Artesië. Doarip viel Boudewyn IX Artesië binn.

In 1199 wierd de vrede van Péronne getêeknd deur Philippe August en Boudewyn IX, woaby da Bethune were an Vloandern kwam. 't Verdrag bepoaldeg ook da Filips I van Noamn, Boudewyn zyn broere, were vry kwam achter dat 'n gevangn was deur Vrankryk.

Da zelfste joar heet 'n tegoare mè zyn vrouwe de kruusvoardersgelofte ofgeleid in de Sint-Donoaskerke van Brugge, en de 14stn april 1202 ist 'n vertrokkn vo de vierde kruustocht.

Zyn vrouwe, die in verwachtienge was, is moar achter gegoan o ze genoeg hersteld was van de geboorte van under dochter Margaretha. Ze vertrok uut Marseille en landde in Akko (Israël), woa da z'hoorde van de veroverienge van Constantinopel en de benoemienge van heur vint tout keizer. Ze wilde vertrekkn no Constantinopel, mo z'is ziek gekommn en de 9stn ogustus 1204 is ze gestorvn.

In juli 1205 is Boudewyn IX overmêesterd gewist deur keunienk Joannitza de Zwartn van de Bulgoarn binst e veldslag en j'is gestorvn in Bulgoars gevangnschap. Z'hen nôois mer etwa van hem g'hôord of gezien.

De groafschappn Vloandern en Henegouwn kwoamn in handn van zyn minderjoarige dochter Johanna, en in Constantinopel wierd 'n ipgevolgd deur zyn broere Hendrik van Vloandern.

Vrouwe en jounges bewerkn

Je trouwde de 6dn januoari 1186 mè Maria van Champagne. Z'haan twi dochters:

  • Johanna (1199-1200 † 1244), gravinne van Vloandern en Henegouwn, getrouwd mè:
    1. in 1212 Ferrand van Portugal
    2. in 1237 Thomas II van Savoye
  • Margaretha II (1202 † 1280), gravinne van Vloandern en Henegouwn, getrouwd mè:
    1. in 1212 (geschid in 1221) Bouchard van Avesnes
    2. in 1223 Willem II van Dampierre