Brugse Mettn

Dit artikel es geschreevn in 't Brugs, en da zou best ozô bluuvn.

Den 18ste meie 1302 woaren der de Brugse Mettn in Brugge. De Bruggeliengen kwamen in ipstand tegen de Fransche keunink en vermôordegen dien nacht 1500 Fransmans en Lelioars. Da was d' aanleidinge vo de Guldnspoornslag ip 11 juli in Kortryk.

Inleidienge

In 't vôorjoar van 1302 begost héél Vloanderen stilan in ipstand te kommen tegen de Fransche keunink Filips den Schoonn. Den tweeden april kwâmen de Gentsche ambachten in ipstand tegen de pôorters die mosten vluchten in ’t Gravensteen.

Begin meie was Willem van Gullik, kleenzeune van Gwyde van Dampierre, de Vlamsche Graaf die nog oltyd in Vrankryk gevangn zat, in Brugge angekommen woar dat ie em 't ope sloeg mè Pieter de Coninck, anvoerder van de Brugse ipstandeliengen. Ze goungen éést no Sysêle en Moale. E groeptjie ounder leidinge van Jan Breydel en den tempelier Willem van Boenhem veroverdege ’t kasteel van Moale en slachtege ’t Frans garnizoen die do laag volledig of.

Da begost de Fransche keunink ollemolle zwoar ip z'n sistèm te werken en dorom liet ie in heel Vrankryk iedereen iproepen vor e leger te maken, ounder de leidinge van Robert II van Artois. Oundertussen trok de Fransche landvoogd, Jacques de Châtillon, met e leger van 800 man gepanserd peirdevolk en 300 man voetvolk no Brugge. De Bruggeliengen wieren benouwd en begosten met em t’ ounderandelen en kosten azo bekommen dan de tegenstanders van de keunink de stad mochten verloaten.

Den 18ste meie 1302

In den vroegen uchtend van den 18ste meie 1302 droungen de dié die den dag tervôoren Brugge verloatn aan de stad were binnen. Ze wieren doby g'olpen deur de simpatiesanten die achtergebleven woaren. Overol in de stad wieren de Fransche en under supporters angevollen en vermôord, dikkers binst dan ze nog in under bedde lagen. Wien dat er under wachtwoord ‘Schild en Vriend’ nie kostege uutspreken, wierd zounder pardong de kele overgesneen. Ol te goare wieren d'r oast 1500 Fransmans en Lelioars (name vo de keuningsgezinde partye) uutgemôord. Jacques de Châtillon kostege mo zuuste uut de stad vluchten.

Vo de Bruggeliengen was ’t zo kloar of pompewoater da de Fransche keunink zo'n vernederinge nie oungestraft gieng loaten. Dorom brochten ze een leger ip de been, da wier angevuld mè ridders en milities van andere delen van Vloandern, woarmee dan ze den elfsten van juli in de Guldnspoornslag 't Franse leger versloegen.

De name Brugse Mettn

De name Brugse Mettn un en ze mo in de 19ste êeuwe uutgevounden (ip 't voorbild van de ‘Sicilioanse Vespers’ ols wanneer da de Fransche in 1282 in Palermo uutgemoard wieren). De schryvers van den tyd zelve spraken van de ‘Goeie Vrydag’ van Brugge.

Schild en Vriend?

D'r is nie lange geleen nog een andere theorie ipgedookn vo 't wachtwôord "Schild en Vriend". Sommigte bewèren dat dat eigentlik most zyn: 's Gilden vriend (vriend van de gilde).

Externe koppelienge

Ofbeeldiengn die ier by passn ku je vien in de categorie Chest of Courtrai van Wikimedia Commons.