Flandria
Flandria is een historisch Vlams merk van brommers en mottos die deur A. Claeys-Flandria in Zillegem gemakt wierdn tusschn 1950 en 1981. Vôdien maktign ze landbouwmachinerie en villos, en in 1933 bouwdigde Aimé Claeys vier prototypes vor een motto, 500 cc-model met een JAP-kopkleppemoteur. 't Bleeft echter by prototypes, en de brommer gieng nôois in produksje.
't Is pas achter den twiddn weirelôorloge dan Aimé en Remi Claeys beslôotn van brommers te produceern in under nieuwe fabrieke in Zillegem. In 1951 kwaam den êeste Claeys-Flandriabrommer met een 40 cc Rex-moteur up de mart. In 1952 verviengn ze dien moteur deur under eign moteur van 49cc, en in 1953 kreeg de brommer twê vitessn en een tankframe (woardat de naftetank binn'n 't frame van de brommer zit). In 't zelste joar begostn ze ook een motto met een 125- en een 175 cc JLO twêtaktmoteur produceern, en in 1954 kwaam ter een scooter met een JLO-moteur van 175 cc en een motto met JLO-moteur van 250 cc.
In 1956 giengn de broers uut mankoar, en de fabrieke wierd in twê bedryvn gesplitst. Aimé bleef brommers maakn ounder d' oude Flandrianame, binst da Remi een nieuw merk uprichtige ounder de name Superia. De Superiabrommers haan Sachsmoteurs.
Deurdat den verkoop van mottos an 't ende van de joarn viftig begost te vermindern stoptige Flandria under produksje en concentreerdig hem up brommers.
Olverwege de joarn zeventig produceerde Flandria mêer dan 100.000 brommers per joar, mè fabriekn in België (Zillegem en Zwevezêle), Holland (Avaros), Vrankryk (Zuud-Woastn), Marokko en Portugal. Flandriablokkn wierdn ook ounder licensje in Spanje (Figueres) gebouwd.
In 1976 bouwdigde Flandria een prototype van de Gila-M enduromoteur, moa da kwaam nôois in produksje, van de fabrieke begost financiêel probleemn t' hèn mè de competiesje van Japaneesche merkn, en in 1981 gienk Flandria failliet.
Gedeurende de zestiger en zevetiger joarn sponsorde Flandria een coureursploeg die over die twientig joar verschillende weireldkampioenn hèt upgeleverd, gelik Rik Van Looy, Jempi Monserré en Freddy Maertens.