Groenereie

Dat artikel es geschreevn in 't Noordelik West-Vlams.

---

De Groenereie is e woatrlôop en e stroate in 't centrum van Brugge. De reie lopt van de Kroane-reie ter ogte van 't Uudevettrspling toe an de byêenkomste mê de Sint-Annareie en de Koepeure, dichte by de Meulnbrugge. De glyknoamige stroate ligt ip den ôostlikkn êft van de zuudlikkn oevre en lopt van de Preediekêernbrugge toe an de Meebrugge. De stroate ip de westlikkn êft van de zuudlikkn oevre êet Stêenowrsdyk, tgêene toe apeupri 1825 ook de noame van de stroate Groenereie was. De Groenereie wordt oovrespann deur de Pêerdebrugge, de Meebrugge en de Blêndn-Eezlbrugge.

Liggienge van de Groenereie (doenkrblow).

Geschiednisse

De noame "Groenereie" zoed ofgeleid zyn van 'n êrberge genaomd 't Groene. Oede Bruggeliengn gebruukn mêesta die noame in de platse van Groenereie. Toe in 't êeste kart van de 19ste êewe wierd de noame Stêenowrsdyk gebruukt lik noame vo de gansche stroate tusschn de Vismart en de Meulnbrugge.

Toe vo kort wierd anveird da de Groenereie gin nateurlikke woatrlôop is, mor e deur de menschn gegroavn gracht vor e voddr geleegn woatrmeuln (an de Meulnbrugge oovr de Sint-Annareie) van woatre te verzienn. Ze zoe vôo den 11stn êewe gegroavn zyn. Vôgns de teegnwôordige inzichtn is de Groenereie wê deeglik e stik van de nateurlikke lôop van de Reie. Vanof 1127 makte de Groenereie dêel uut van d' êeste stadsomwollienge van Brugge.

An de Groenereie ligt 't merkwoardige godsuus "De Peeliekoane". Drneffnst stoenn de (nu verdweenn) gebown van de lieberoale gazette Journal de Bruges, die geleid wierd deur Caroline Clémence Boussart en eur vint Philippe Chrétien Popp.

• 
  De stroate "Groenereie" lopt lans 't glyknoamige kanoal, ier ip e foto tusschn 1890 en 1900, uutgegeevn deur de firma "Photochrom" in Zürich
• 
  De Groenereie
• 
  De Pêerdebrugge oovre de Groenereie.
• 
  De Meebrugge oovre de Groenereie.
• 
  De 16ste êewschn achtrgeevle van 't Landuus van 't Brugsche Vrye an de Groenereie.

E bitje voddr kykn

• (nl) Schouteet, Albert 1977 : De straatnamen van Brugge. Oorsprong en betekenis, Brugge, ISBN 9789062675036.
• (nl) Beernaert, Brigitte e. a. 1993 : Groenerei 8-12, Godshuis De Pelikaan, in : 17de-eeuwse architectuur in de binnenstad, Open Monumentendag 1993, Brugge.
• (nl) Ryckaert, Marc & Hillewaert, Bieke 2011 : De vroegste topografische ontwikkeling van het middeleeuwse Brugge, van de 9de tot het begin van de 12de eeuw, in : Hillewaert, Bieke e.a. (red.), Op het raakvlak van twee landschappen. De vroegste geschiedenis van Brugge, Brugge, p. 140-155.
• (nl) Weymeis, Chris 2012 : Brugge van Academiestraat tot Zwijnstraat. Deel 2 (E tot I), Brugge.

Ofbeeldiengn die ier by passn ku je vien in de categorie Groenerei (Brugge) van Wikimedia Commons.