Hans Memling

Hans Memling (ca. 1433 Seligenstadt (Duutsland) - 11 ogustus 1494 Brugge) wos nen Vlamschn kunstschilder.

Persoonlik leevn

Hans Memling wos êen van de belangrykste kunstenoars uut de vichtiende êeuwe, da wos an 't ende van 't Bourgondisch Ryk. Je wos geboorn in Duutsland tusschn 1430-1440 in Seligenstadt, nie verre van Frankfurt. Je wos getrouwd mei Anna de Valkenaere, by wien datn drie joungns eit g'ed. Ze weundn in e grôot uus in de Sint-Jorisstroate in Brugge. J'es doa gestorvn in 1494 en begroavn in de Sint-Gilliskerke.

Publiek leevn

Memling es êen van de mêest bekende klassiekers van de Vlamsche Primitievn die in dien tyd de grotste schole vo schilderkunst wos van hêel Europa.

't Ziet er noar uut da Memling ne leerlienk wos van Rogier Van der Weyden die in Brussel wrochte moa elegansn zekers es da nie. Achter Rogiers zynen dood in 1464 es Memling veruusd na Brugge. J'es begunn mei portrettn te moakn in ipdracht van de Bourgondische ertoogn. Moa ook de geestelikkn en de ryke burgery maktn dêel uut van zyn clientèle.

J'ad ook vele ipdrachtgevers in 't buutnland, lik Itoalië en Spanje, woadeure da vele van zyn schilderyen in die landn zyn terechte gekommn.

De ryke Bruggeliengn goavn em den titel van beste schilder van 't hêle Christendom. Achter zynen dôod es de paneelschilderkunste in Brugge aanzienlik achteruut gegoane.

Mater dolorosa (1480's)

Zynen styl

D'r zyn mêer dan 100 schilderyen gekend van em. E hêle reke es nog anwezig in 't Oud Sint-Jan in Brugge. Zyn ounderwerpn goan voorol over religieuze thema's, lik den Bybel en illigenlevens. Memling kiest voor gestileerde vormn en personoages. Zyn schilderyen stroaln een ipvollende ruste uut en zyn styf gebalanceerd in mekoar gestookn. Juste lik Jan Van Eyck vichtig joar idder wos ook Memling bezeetn deur de details. Olles moeste zo gedetailleerd meugelik voorgesteld zyn, tot ip de klinste schoale.

Zyn meesterwerkn

Triptiek van het Laatste Oordeel, voor 1472, Muzeum Narodowe, Gdansk
Triptiek van Sir John Donne of Kidwelly, ca. 1475, National Gallery, Lond'n
Triptiek van Johannes de Doper en Johannes de Evangelist (ook wel Sint-Jansaltaarstuk genoemd), 1479, Sint-Janshospitaal, Brugge
- Markant detail: ip het middenpaneel, "De H. Maagd aanbeden door heiligen", eit oogstwoarschynlik ertoginne Maria van Bourgondië, groavinne van Vloandern, geposeerd vo d'Illige Catherina. Dat is de vrouwe die lienksounder geknield zit.
Moreel-triptiek, 1484, Groeningemuseum, Brugge
De ijdelheid en de duivel, ca. 1485, Musée des Beaux-Arts, Stroatsburg
Schrijn van de H. Ursula, 1489, Sint-Janshospitaal, Brugge
Allegorie van de Kuisheid, Musée Jacquemart-André, Paris
Triptiek van de aardse ijdelheid en de hemelse verlossing