Jean II van Vrankryk

Jean II, de Goein genoemd, van 't Huus Valois, (Château du Gué de Maulny (Le Mans), 26 april 1319 – Londn, 8 april 1364) was keunienk van Vrankryk van 1350 tout 1364. Je wierd ip 26 september 1350 gekrôond in de kathedroale van Reims.

Jean II was den oudste zeune van keunienk Philippe VI van Vrankryk en Jeanne van Bourgondië, een dochter van hertog Robert II van Bourgondië en Agnes, de joungste dochter van keunienk Louis IX van Vrankryk.

Binst zyn regerienge krêegt ie te moakn me verschillige rampn. Nie allêene de probleemn van den Hounderdjoarign Oorloge die vulup bezig was, moar ook was de Zwartn Dôod tusschn 1346 en 1351 in Europa uutgebrookn. Die epidemie zorgde vo den dôod van bykan den helt van zyn populoasje.

J'haad ook veel miserie met Edward III van Iengeland en Charles de Slichtn van Navarra, die tegoare een complot teegn hem beroamdn, vor hem te probeern van zyn trôone stuukn.

Vrouwn en jounges

Jean II trouwde in Melun ip 28 juli 1332 an zyn 13 joar me Bonne (of Jutta) van Luxemburg, die ton 16 joar oud was. Ze was e dochter van Jan de Blendn van Luxemburg, de keunienk van Boheemn. Ze stierf in september 1349 an de Zwartn Dôod, te middn van d'epidemie in Europa (1346-1351).

Under jounges:

1. Blanche (1336-1336)
2. Charles V (21 januoari 1338-16 september 1380), keunienk van Vrankryk
3. Catherine (1338-1338)
4. Louis (1339-1384), hertog van Anjou
5. Jean (1340-1416)
6. Philippe (1342-1404) of Filips de Stoutn, hertog van Bourgondië, trouwde me Margaretha van Male
7. Jeanne (1343-1373), trouwde me Charles de Slichtn, keunienk van Navarra
8. Marie (1344-1404)
9. Agnes (1345-1349)
10. Marguerite (1347-1352)
11. Isabelle (1348-1372)

Ofbeeldiengn die ier by passn ku je vien in de categorie John II of France van Wikimedia Commons.