Joseph Suvée
Joseph Benoît Suvée of Jozef Suvée (Brugge, 3 januoari 1743 - Rome, 9 februoari 1807) was e West-Vlamsche kunstschilder. Je was êen van d' êeste neoclassicistische schilders en je was directeur van de Fransche academie in Rome.
Joseph Suvée, geboorn in de Korte Vuldersstroate nevest de Sint-Salvatorskathedroale, startte zyn ipleidienge an de Brugsche academie. In 1763, an zyn 19 joar, trokt ie noa Parys en je volgde lessn an d' Académie Saint-Luc en loater an d' Académie royale de peinture et de sculpture. Doa deed ie in 1771 mee an de schiftiengsproevn vo de prestigieuze Prix de Rome. De winnoare van die prys mocht e studiereize noa Rome moakn. Den 31stn ogustus 1771 wierd Suvée uutgeroopn toet winnoare mè zyn inzendienge De stryd tusschn Mars en Minerva, vo Jacques-Louis David. Tusschn David en Suvée is 't nôois mè goed gekommn.
Van 1772 toet 1778 bleeft ie by de Fransche academie in Rome. Were in Parys begost ie e kunstschoole vo joenge vrouwn in 't Louvre. In 1792 wierd Suvée benoemd toet directeur van de Fransche academie in Rome.
Werk
bewerknSuvée begost ols barokschilder moar evolueerde loater noa 't neoclassicisme. Je schilderde historische en religieuze taferêeln en makte portreitn van menschn die leefdn in zyn tyd.
-
De stryd tusschn Mars en Minerva (1771), Palais des Beaux-Arts in Rysel -
De Verryzenisse (1783) in de Sint-Walburgakerke in Brugge -
Admiroal de Coligny makt indruk ip zyn môordenoars (1787), Musée des Beaux-Arts in Dijon
In Brugge ist er e stroate noar hem vernoemd, De Jozef Suvéestroate ('t Suveestretje), nie verre van de vismarkt.
|
Ofbeeldiengn die ier by passn ku je vien in de categorie Joseph-Benoît Suvée van Wikimedia Commons. |