Charles II van Navarra

Charles II van Navarra, bygenoamd de Slichtn, (Frãns: Charles le Mauvais) (Évreux, 10 oktober 1332 - Pamplona, 1 januoari 1387) was keunienk van Navarra van 1349 tout 1387 en groaf van Évreux van 1343 tout 1387. Zyn verschrikkelykn dôod, woaby dat ie leevnd verbrandde, wierd anzien als e straffe van God.

Charles was den oudste zeune van Philippe van Évreux en Joanna II van Navarra.

Zyn bezittiengn in 't bruun

Neffest et keunienkryk Navarra an de Pyreneen erfdegt ie ook veel bezittiengn van zyn ouders in 't nôordn van Vrankryk. Van zyn voader surtout in Normandië: Évreux, Mortain, stikkn van Vexin en Cotentin. Van zyn moeder: Champagne en Brie.

Je speeldeg e grôote rolle binst den Hounderdjoarign Oorloge van Iengeland teegn Vrankryk (1337-1453), die begost was achter da Charles IV van Vrankryk gestorvn was zounder mannelikkn ipvolger.

Den Iengelsche keunienk Edward III claimde de Frãnsche krôone omda zyn moeder Isabelle een dochter was van de Philippe IV le Bel. Mo Charles II kost ook ansproake moakn, want zowel an de kant van zyn moeder of an de kant van zyn voader haad ie Frãns keunienklyk bloed. Zyn moeder was de dochter van Louis X van Vrankryk en zyn voader was e klêenzeune van Philippe III van Vrankryk. Uutendelyk kostn z'et nie hoaln van et Huus Valois. Charles II spande tegoare met Edward III van Iengeland en je wierd een ende vaste gezet deur keunienk Jean II van Vrankryk.

In 1361 kêerdegt ie were noa Navarra.

Vrouwe en jounges

Charles II trouwde in februoari 1352 me Jeanne van Valois, dochter van keunienk Jean II en Bonne van Luxemburg. Under jounges:

1. Marie (1360-ca. 1400), getrouwd met Alfonso van Aragón
2. Charles III van Navarra (1361-1425), zyn ipvolger
3. Bonne (1364-ca. 1389)
4. Peter (1366-1412)
5. Philippe Filips (1368), jounk gestorvn
6. Joanna van Navarra (1370-1437), getrouwd met Jean IV van Bretagne en loater met Hendrik IV van Iengeland
7. Blanche (1372-1385)

Ofbeeldiengn die ier by passn ku je vien in de categorie Charles II of Navarre van Wikimedia Commons.