Lodewyk I

Lodewyk I van Vloandern (°Névers, round 1304 - † Crécy, 26 ogustus 1346) wos groaf van Vloandern, Nevers en Rethel. En is ouk ekend ounder de noame Lodewyk van Nevers (Lodewyk II) of Lodewyk van Crécy.

In Vloandern wost 'n den opvolger van zyn grotvoader Robrecht van Béthune. Zyn voader Lodewyk I van Nevers wos gin groaf van Vloandern.

Beleid teegn Vloandern

Lodewyk wos opekwikt an 't of in Parys. E trouwt doar op 21 juli 1320 mi Margaretha, de dochter (8 joar) van keuning Philippe V. Omdat 'n in Vrankryk is opegroeid, wos zyn beleid ton ouk op 't Fransche ericht. Zyn vôorgangers kêekn mêer uut nar Iengeland, omda ze dat e goe verweir voen teegn Vrankryk dat ossan grodder wilde komn. Iengeland leverde vele wulle an Vloandern da doamei ryke wos ekommn. De polletiek van Lodewyk zorde voe wrevel by zyn Vlamsche ounderdoann, en de grôte steedn lik Brugge en Gent.

Azo kwamt 'n ouk in kweiste me Klaas Zannekin en zyn mann binst de Boerenipstand van Kust-Vloandern. E versloeg Zannekin in de Slag by Kassel.

In 1335 miek Lodewyk I de Gentenoars kwoad, omdat 'n de Vloamiengn - op bevel van Philippe VI, keunienk van Vrankryk - dwoung om in ôorlog te goan met Iengeland en keunienk Edward III. 't Woarn d'êeste têekns van 'n Ounderdjoarigen ôorlog. Vloandern adde gin wulle ne mi, e wos platzak. De Gentenoars, ounder leidieng van Jacob van Artevelde, kwaamn in 1338 in opstand. Lodewyk I sloeg op de vlucht. Toen da Van Artevelde vermôord wos (in 1345) probeerde Lodewyk I were te kêern na Gent, moa dat mislukte.

Lodewyk komt an zyn ende in de Slag by Crécy in 1346, teegn d'Iengelsche. Zyn opvolger, als groaf van Vloandern, wos Lodewyk van Male.

Ofbeeldiengn die ier by passn ku je vien in de categorie Louis I, Count of Flanders van Wikimedia Commons.