Lodewyk van Nassau


Lodewyk van Nassau (Dillenburg (Hessen), 10 januoari 1538 - Mook, 14 april 1574) was e zeune van Willem I van Nassau-Dillenburg en gravinne Juliana van Stolberg. Je was e joengere broere van Willem van Oranje en zyn vertrouwnsman en secretoaris.

Lodewyk van Nassau, groaf van Nassau-Dillenburg

An de vôoroavond van de Tachtigjoarign Oorloge was Lodewyk êen van de leyders van 't Eedverboend der Edeln en mede-ipsteller van 't Smeekschrift der Edeln dat ofgegeevn wierd an landvoogdesse Margaretha van Parma. 't Verboend vroeg d' ipheffienge van d' Inquisiesje en een ofzwakkienge van de vervolgiengn van de protestantn mè moatregeln teegn de ketters. Moa Filips II van Spanje wilde nie luustern noa 't smeekschrift. Je reageerde ip d' oenlustn en de Beeldnstorm deur troepn te zendn oender leydienge van den hertog van Alva.

Lodewyk voerde de troepn an van Willem van Oranje by de Slag by Heiligerlee, woarby da zyn broere Adolf sneuvelde. Loater wierd 'n versleegn deur de troepn van Alva by de Slag by Jemmingen. Deur in zyn blôotn over de Eems te zwemm'n kost 'n ip 't nippertje gered wordn.

Je gienk ton noa Vrankryk woar dat 'n in diplomatieke dienst was vo zyn broere Willem. In Vrankryk oenderhield 'n ook contactn met d' hugenootn. Je leydde in 1569 hugenootse troepn by Montcontour, moa ze wierdn versleegn en Lodewyk most vluchtn uut Vrankryk. Doarachter kwamt 'n were legeranvoerder in de Nederlandn.

Os de woatergeuzn den 1stn april 1572 Den Briel veroverd hadd'n, zagt 'n de kanse vo den 23ste en 24ste meie de steedn Valencyn en Bergn in 't groafschap Henegouwn te bezett'n. Alva belegerde doarip Bergn en by 't uutbluuvn van versterkiengn most Lodewyk de stad ipgeevn. Tegoare mè zyn broere Hendrik voerdeget ie noadien de legers an by de Slag ip de Mookerheide, woa dat 'n sneuvelde. Zyn stoffelyk overschot is nôois weregevoendn.

Wikimedia Commons