Louis VII van Vrankryk

Louis VII, de Joungn genoemd (Frãns: le Jeune), van 't Huus Capet, (1120-Parys, 18 september 1180), was keunienk van de Frankn van 1137 tout 1180. Je was de zeune van Louis VI van Vrankryk en Adelaide van Savoie.

Ip 25 oktober 1131 wierd ie gekrôond tout co-keunienk in de kathedroale van Reims, achter da zyn oudere broere Philippe veroungelukt was me zyn peird. En achter 'n dôod van zyn voader wierd ie tout keunienk gekrôond in de kathedroale Saint-Étienne van Bourges, ip 25 december 1137.

Je trouwde met hertoginne Eleanore van Aquitanië, êen van de rykste en machtigste vrouwn van West-Europa. Moar under huwelik wierd g'annuleerd in 1152, achter dat er gin mannelikkn ipvolger kwam. Direct achter d'annuloasje trouwde Eleanore me Henry Curtmantle, hertog van Normandië en groaf van Anjou van 't Huus Plantagenet, die in 1154 keunienk van Iengeland kwam. Met hem krêeg ze vuuf zeuns w.o. twi keuniengn van Iengeland: Richard Leeuwenhart en Jan zounder Land.

Vrouwn en jounges

Met Eleonore van Aquitanië haad ie twi dochters:

• Marie (1145-1198)
• Alix (1151 - 1195)

Me zyn twidde vrouwe (1154) Constance van Castilië ook twi dochters:

• Marguerite (1158 - 1197)
• Adèle of Alys (1160-1220)

Me zyn derde vrouwe Adele van Champagne:

• Philippe II Auguste (1165 - 1223), zyn ipvolger
• Agnes (1171 - 1240)

Louis VII stelde de groaf van Vloandern Filips van den Elzas an tout roadgever en begeleider van zyn zeune en krôonprins Philippe, die ton vêertien joar oud was. Philippe wierd ip 1 november 1179 gekrôond in de kathedroale van Reims. E joar loater stierf Louis. J'is begroavn in d'abdye Notre-Dame-de-Barbeaux by Fontainebleau. In 1817 hen z'hem herbegroavn in de kathedroale van Saint-Denis.

Ofbeeldiengn die ier by passn ku je vien in de categorie Louis VII of France van Wikimedia Commons.